ఇన్​స్టాలో యువతిని వేధిస్తున్న నిందితుడి అరెస్ట్​

అతనో కొరియోగ్రాఫర్​. గతంలో ఓ షార్ట్​ఫిల్మ్​లో నటించిన యువతితో అతనికి ఏర్పడిన పరిచయం కాస్తా ప్రేమగా మారింది. ఇంతలోనే ఇద్దరి మధ్య మనస్పర్ధలతో యువతి అతడితో మాట్లాడటం మానేసింది. దీంతో కక్ష పెంచుకున్న ప్రియుడు.. ఇన్​స్టాలో నకిలీ ఖాతా సృష్టించి ప్రియురాలిని వేధింపులకు గురిచేయడం మొదలెట్టాడు. బాధితురాలు సైబర్ క్రైం పోలీసులను ఆశ్రయించగా.. పోలీసులు నిందితుడిని అరెస్ట్​ చేశారు.

ఇన్‌స్టాగ్రామ్​లో యువతి పేరుతో నకిలీ ఖాతా తెరిచి అసభ్యకర ఫొటోలను పెడుతూ వేధింపులకు గురిచేస్తోన్న మణిప్రసాద్​​ అనే కొరియోగ్రాఫర్​ను రాచకొండ సైబర్ క్రైం పోలీసులు అరెస్ట్ చేశారు. గతంలో ఓ షార్ట్​ఫిల్మ్​లో నటించిన యువతితో మణిప్రసాద్​​కు పరిచయం ఏర్పడింది. అది కాస్తా ప్రేమగా మారింది. ఇద్దరి మధ్య మనస్పర్ధలు రావడంతో యువతి మణిప్రసాద్​తో మాట్లాడటం మానేసింది.

కక్ష పెంచుకున్న మణిప్రసాద్​ తన వద్ద ఉన్న యువతి ఫొటోలతో ఇన్‌స్టాగ్రామ్ ఖాతా తెరిచి అసభ్యకర పోస్టులు పెట్టాడు. దీంతో బాధితురాలు పోలీసులను ఆశ్రయించగా.. దర్యాప్తు చేసిన పోలీసులు నిందితుడిని అరెస్ట్ చేసి రిమాండ్​కు తరలించారు.