APSEC alerts on cyber crime: సైబర్‌ నేరగాళ్లు ఎప్పటికప్పుడు కొత్త పద్ధతుల్లో నేరాలకు తెగబడుతున్నారు. ఓటరు కార్డుతో ఆధార్ అనుసంధానానికి ఉద్దేశించిన ఎన్నికల చట్టాల సవరణ బిల్లు-2021.... ఇటీవల పార్లమెంటులో ఆమోదం పొందిన నేపథ్యంలో ఆ అంశాన్ని అడ్డం పెట్టుకుని మోసాలకు తెరలేపారు. ఓటరు కార్డును ఆధార్తో అనుసంధానించాలంటూ ఎన్నికల సంఘం పేరుతో లింక్‌లు పంపిస్తే అందరూ సులువుగా నమ్మేస్తారనే ఉద్దేశంతో ఈ ఎత్తుగడను అవలంబిస్తున్నారు. గత రెండు, మూడు రోజులుగా ఆంధ్రప్రదేశ్‌లోని చాలామంది సెల్‌ఫోన్లకు ఇలాంటి ఎస్‌ఎంఎస్‌లు పెద్ద ఎత్తున వస్తున్నాయి. అవి నిజంగా ఎన్నికల సంఘం పంపించిన సందేశాలేనా అని నిర్ధారించుకునేందుకు ఎన్నికల సంఘం ఏర్పాటు చేసిన 1950 కాల్‌సెంటర్‌కు రోజుకు సగటున 20-25 ఫోన్‌ కాల్స్‌ వస్తున్నాయి. ఆ లింక్‌లపై క్లిక్‌ చేసి తాము మోసపోయామని కూడా కొందరు బాధితులు ఫిర్యాదు చేస్తున్నారు.
ఆ లింక్‌ను క్లిక్‌ చేయొద్దు..
Aadhar Cyber Crimes : మోసపూరిత లింక్‌లను క్లిక్‌ చేస్తే నష్టపోవడం ఖాయం. ఆ లింక్‌ తెరవగానే సైబర్‌ నేరగాళ్లు కొన్ని స్పైవేర్‌లు, మాల్‌వేర్‌లను మన మొబైల్‌ ఫోన్లలోకి చొప్పించి వాటిని వారి ఆధీనంలోకి తీసుకుంటారు. మొబైల్‌ బ్యాంకింగ్‌లో లావాదేవీలు నిర్వహించినప్పుడు సెల్‌ఫోన్‌లో పొందుపరిచే యూజర్‌నేమ్‌, పాస్‌వర్డ్‌ వంటి వాటిని, డెబిట్‌, క్రెడిట్ కార్డుల క్రెడిన్షియల్స్‌ను తస్కరిస్తారు. వాటిని వినియోగించి బ్యాంకు ఖాతాలను కొల్లగొడతారు. కొన్ని సందర్భాల్లో సెల్‌ఫోన్‌లలోని వ్యక్తిగత సమాచారాన్ని తస్కరించి బెదిరింపులకు పాల్పడే అవకాశమూ ఉంది. లింక్‌లో పొందుపరిచే ఆధార్ కార్డు, వివరాలు ఆధారంగా కూడా వాటిని దుర్వినియోగం చేసే అవకాశం ఉంది.
ఆధార్ అనుసంధానం తప్పనిసరి కాదు..