ఔటర్ రింగ్‌రోడ్‌పై ప్రమాదం... ఇద్దరు సజీవదహనం

నగరశివారులోని అప్ప జంక్షన్ సమీపంలో ఔటర్​ రింగ్​ రోడ్డుపై ఓ కంటైనర్​ ప్రమాదానికి గురైంది. ఈ ఘటనలో డ్రైవర్, సహడ్రైవర్ అక్కడికక్కడే సజీవదహనమయ్యారు. రాజేంద్రనగర్​ పోలీసులు కేసు నమోదు చేసుకుని దర్యాప్తు ప్రారంభించారు.

రంగారెడ్డి జిల్లా రాజేంద్రనగర్​ వద్ద ఓఆర్​ఆర్​పై ప్రమాదం జరిగింది. ఆంధ్రా నుంచి సీఫుడ్​తో వస్తున్న కంటైనర్​(AP39TQ5734)... ముందు వెళ్తున్న మరో వాహనాన్ని ఢీకొట్టింది. దీంతో ఒక్కసారిగా కంటైనర్​ క్యాబిన్​లో మంటలు చెలరేగాయి. తీవ్ర రూపం దాల్చి లారీ పూర్తిగా తగలబడిపోయింది. డోర్లు లాక్​ అవడంతో డ్రైవర్ మృత్యుంజయ, సహ డ్రైవర్ సూర్యకుమార్​​ బయటకు వచ్చే పరిస్థితి లేకపోయింది.

వీరి ఆర్తనాదాలు విని కొందరు వాహనదారులు వారిని బయటకు తీసేందుకు ప్రయత్నించినా అవీ విఫలమయ్యాయి. మంటల్లో చిక్కుకుని డ్రైవర్, సహడ్రైవర్ ఇద్దరూ ఆహుతయ్యారు. సమాచారం అందుకున్న పోలీసులు ఘటనాస్థలానికి చేరుకుని మంటలను ఆర్పేశారు. క్యాబిన్​లో ఇరుక్కున్న మృతదేహలని వెలికి తీశారు. లారీ డ్రైవర్ మృత్యుంజయ యాదవ్ మహారాష్ట్రలోని థానేకి చెందిన వ్యక్తిగా, సహ డ్రైవర్​ సూర్యకుమార్ ఉత్తరప్రదేశ్​ వారిగా గుర్తించారు. కంటైనర్​ యాజమాని ఏపీలోని పాలకొల్లుకి చెందిన ఉమామహేశ్వర్​గా గుర్తించారు. కేసు నమోదు చేసుకుని దర్యాప్తు చేస్తున్నట్లు ఏసీపీ భాస్కర్ తెలిపారు.

ఇదీ చూడండి:అంబేడ్కర్​ జయంత్యుత్సవాల్లో అపశ్రుతి.. విద్యుదాఘాతంతో యువకుడు మృతి