ATTACK ON YOUNG WOMAN: ప్రేమోన్మాదం.. యువతిపై యువకుడి కత్తి దాడి

15:08 August 04

ప్రేమోన్మాదం.. యువతిపై యువకుడి కత్తి దాడి

యువతి ప్రేమించడంలేదని కత్తితో దాడి చేసిన యువకుడు... అదే కత్తితో పొడుచుకున్న ఘటన సికింద్రాబాద్​ బోయిన్​పల్లి పీఎస్ పరిధిలో చోటు చేసుకుంది. యువతికి స్వల్ప గాయాలు కాగా... యువకుడికి మాత్రం తీవ్ర రక్తస్రావమైంది. బోయిన్​పల్లి పీఎస్ పరిధిలోని బాపూజీనగర్​కు చెందిన చామంతి... ఓ సూపర్ మార్కెట్​లో పని చేస్తోంది. యాప్రాల్​కు చెందిన గిరీష్​కు చామంతికి గతంలో పరిచయం ఉంది. ప్రేమ పేరుతో వెంట పడటంతో చామంది రెండు నెలల క్రితం బోయిన్​పల్లి పీఎస్​లో ఫిర్యాదు చేసింది. కేసు నమోదు చేసిన పోలీసులు గిరీష్​కు కౌన్సిలింగ్ ఇచ్చిన తర్వాత న్యాయస్థానంలో హాజరుపర్చారు. న్యాయమూర్తి గిరీష్​కు జరిమానా విధించారు. 

చామంతి పట్ల ద్వేషం పెంచుకున్న గిరీష్ ఈ రోజు మధ్యాహ్న సమయంలో బాపూజీనగర్​లో ఉంటున్న ఆమె ఇంటికి వెళ్లాడు. చామంతితో వాగ్వాదానికి దిగాడు. ఈ క్రమంలో తన వెంట తెచ్చుకున్న కూరగాయలు కోసే కత్తితో యువతిపై దాడి చేశాడు. యువతి తల్లిదండ్రులు కేకలు వేయడంతో చుట్టుపక్కల వాళ్లు ఇంటి వద్దకు చేరుకున్నారు. గిరీష్ అదే కత్తితో పొడుచుకున్నాడు. తీవ్ర రక్తస్రావం కావడంతో అక్కడే స్పృహ తప్పి పడిపోయాడు. స్థానికులు సమాచారంతో ఘటనా స్థలానికి చేరుకున్న పోలీసులు గిరీష్​ను గాంధీ ఆస్పత్రికి తరలించారు. బాధితురాలు చామంతిని స్థానికంగా ఉన్న ఓ ప్రైవేట్ ఆస్పత్రిలో చేర్పించారు. దాడి ఘటనపై బోయిన్ పల్లి పోలీసులు కేసు నమోదు చేశారు. ఘటనా స్థలంలో క్లూస్ టీం, ఆధారాలు సేకరించింది.

'మధ్యాహ్నం సమయంలో ఈ దాడి జరిగింది. ఇంట్లో నుంచి పెద్ద అరుపులు వినిపించాయి. వెంటనే మేమంతా వెళ్లి చూశాం. ఆ యువకుడు ఇక్కడికి రావడం ఇదే తొలిసారి. రక్తపు మడుగులో ఉన్న ఇద్దరినీ స్థానిక ఆస్పత్రికి తరలించాం. వెంటనే పోలీసులకు సమాచారం ఇచ్చాం.'

-లక్ష్మి, స్థానికురాలు

ఇదీ చదవండి:నల్లమల అటవీ ప్రాంతంలో బాలిక కిడ్నాప్​.. గాలింపు ముమ్మరం