Papidigudem Accident Today : భద్రాద్రి కొత్తగూడెం జిల్లాలో ఘోర రోడ్డుప్రమాదం చోటుచేసుకుంది. అశ్వారావుపేట మండలం పాపిడిగూడెంలో ఓ కళాశాల బస్సు అదుపు తప్పి బోల్తాపడింది. ప్రమాదంలో పలువురు విద్యార్థులకు గాయాలయ్యాయి. వివరాల్లోకి వెళ్తే.. ఖమ్మం జిల్లా సత్తుపల్లిలోని గీతం ప్రైవేటు కళాశాలకు చెందిన విద్యార్థులను విజ్ఞాన యాత్రలో భాగంగా ఆంధ్రాలోని తూర్పు గోదావరి జిల్లా కడియం నర్సరీల పరిశీలనకు తీసుకువెళ్తున్నారు. ఈ క్రమంలోనే అశ్వారావుపేట మండలం పాపిడిగూడెం సమీపంలోకి రాగానే ఎదురుగా వస్తున్న వాహనాన్ని తప్పించిపోయి బస్సు అదుపుతప్పి బోల్తా పడింది.
ఘటనలో 19 మంది విద్యార్థులకు స్వల్ప గాయాలయ్యాయి. క్షతగాత్రులను అశ్వారావుపేట ప్రభుత్వ ఆసుపత్రికి తరలించి చికిత్స అందించారు. ప్రమాద సమయంలో బస్సులో 41 మంది విద్యార్థులతో పాటు మరో 11 మంది సిబ్బంది ఉన్నారు. డ్రైవర్ నిర్లక్ష్యం కారణంగానే ప్రమాదం సంభవించినట్లు సమాచారం.