కులం పేరుతో దూషించడమే కాకుండా వ్యక్తిపై దాడి చేసిన ఘటన వరంగల్ నగరంలో వెలుగుచూసింది. వరంగల్ అర్బన్ జిల్లా కరీమాబాద్ ప్రాంతానికి చెందిన భారతీయ జనతా పార్టీ ముఖ్య నాయకుడు మాచర్ల దీన్ దయాల్ తన అనుచరులతో కలిసి రామకృష్ణ అనే వ్యక్తిపై దాడి చేశారని బాధిత కుటుంబ సభ్యులు ఆరోపించారు. గాయపడ్డ రామకృష్ణ తనకు న్యాయం చేయాలంటూ దీన్ దయాల్ కుటుంబ సభ్యుల వద్దకు వెళ్లగా మరోసారి దుర్భాషలాడారని వాపోయారు. మనస్తాపానికి గురైన రామకృష్ణ పురుగుల మందు తాగి... ఆత్మహత్యకు యత్నించారు. రామకృష్ణను వెంటనే ఆస్పత్రికి తరలించారు.
దీన్ దయాల్ తండ్రి మాచర్ల సాంబయ్య... తన తల్లికి స్థలం అమ్మారని రామకృష్ణ చెబుతున్నాడు. ఆ భూమికి ఇప్పుడు నకిలీ పత్రాలు సృష్టించి తమను తీవ్ర ఇబ్బందులకు గురి చేస్తున్నారని బాధితుడు వాపోయాడు. దీన్ దయాల్ వృత్తిరీత్యా లాయర్, భారతీయ జనతా పార్టీ కీలక నేత కావడంతో అధికారులు ఎవరూ తమ గోడును పట్టించుకోవడం లేదంటూ ఆవేదన వ్యక్తం చేశారు. ఇదే సమస్యపై రామకృష్ణ తల్లి కలెక్టరేట్ వద్ద గతంలో ఆత్మహత్యాయత్నానికి పాల్పడిందని వివరించాడు. బాధితుల ఫిర్యాదుతో పోలీసులు కేసు నమోదు చేశారు.