custom rice milling scandal: పెద్దపల్లి జిల్లాలో సుల్తానాబాద్ మండలం పూసాల గ్రామంలోని లక్ష్మీనర్సింహ రైస్ మిల్లులో కస్టమ్ రైస్ మిల్లింగ్ కుంభకోణం బయటపడింది. పౌరసరఫరాల శాఖ సీఎంఆర్ కింద రైస్ మిల్లుకు ఇచ్చిన వడ్లను బియ్యంగా మార్చి ఎఫ్సీఐకి ఇవ్వాలి. లెవీ పెట్టాల్సిన బియ్యంను మిల్లు యజమాని బహిరంగ మార్కెట్లో అమ్ముకున్న వైనం బహిర్గతమైంది. లెవీ బియ్యంపై ఫిర్యాదులు రావడంతో పౌరసరఫరాల శాఖ అధికారులు తనిఖీలు చేపట్టారు. రైస్ మిల్కు అప్పగించిన సీఎంఆర్ ధాన్యం మాయమైనట్లు అధికారులు గుర్తించారు. లక్ష్మీనరసింహ ఇండస్ట్రీస్కు పౌరసరఫరాల శాఖ 91,258 క్వింటాళ్ల ధాన్యాన్ని కేటాయించారు. రూ.5,95,98,278 విలువ గల 21,100 క్వింటాళ్ల బియ్యంను మాయం చేశారు.
మిల్లు యజమాని ఎఫ్సీఐకి బియ్యాన్ని చెల్లించాల్సిన గడువు పూర్తయినప్పటికీ అప్పగించకపోవడంతో అనుమానం వ్యక్తం చేశారు. దీంతో గతంలోనే అధికారులు తనిఖీలు చేపట్టారు. బియ్యం అప్పగించాలంటూ హెచ్చరికలు జారీ చేశారు. కానీ మిల్లు యాజమాన్యంలో మార్పు రాకపోవడంతో శనివారం సుల్తానాబాద్ పోలీస్స్టేషన్లో పౌరసరఫరాల శాఖ అధికారులు ఫిర్యాదు చేశారు. పోలీసులు కేసు నమోదు చేసి దర్యాప్తు చేపట్టారు. అదేవిధంగా పెద్దపల్లి జిల్లాలోని మరిన్ని రైస్ మిల్లుల్లో తనిఖీలు నిర్వహిస్తే పెద్దఎత్తున కుంభకోణాలు బహిర్గతమయ్యే అవకాశాలు ఉన్నాయనే అనుమానాలు వ్యక్తమవుతున్నాయి.