పెరుగు ప్యాకెట్​ తీసుకొచ్చేందుకు వెళ్లి.. ప్రాణాలే కోల్పోయాడు..!

8th class boy died: ఆ కుటుంబ గ్రహపాటో.. తల్లిదండ్రుల ఏమరపాటో.. పిల్లాడి పొరపాటో.. ఫలితంగా ఓ నిండు ప్రాణం గాల్లో కలిసిపోయింది. అమ్మ చెప్పిందని పెరుగు ప్యాకెట్​ కోసమని వెళ్లిన పిల్లాడు.. మళ్లీ తిరిగిరాలేదు. అమ్మానాన్నలకు తెలియకుండా.. అత్యుత్సాహంతో ద్విచక్రవాహనంపై వెళ్లి తన ప్రాణాలు కోల్పోయి పుత్రశోకాన్ని మిగిల్చాడు.

8th class boy died: ద్విచక్రవాహనం నడపాలన్న ఉత్సుకత ఏవైపు.. మాకూ నడపొచ్చిందన్న అత్యుత్సాహం మరోవైపు.. తల్లిదండ్రులు ఏ చిన్న పని చెప్పినా పిల్లలు(మైనర్లు) బండి మీదే వెళ్తున్నారు. తల్లిదండ్రులకు తెలియకుండా కొన్నిసార్లు వెళ్తుంటే.. మారం చేసి మరీ ఇంకొన్ని సార్లు బైకులు తీసుకెళ్తున్నారు. "దగ్గరే కదా.. ఏముందిలే.. వాడికి కూడా అలవాటవుతుంది.." అని తల్లిదండ్రులు కూడా చూసీచూడనట్టు వదిలేస్తున్నారు. మొత్తంగా మైనర్లు బండ్లపై రోడ్డెక్కి.. ప్రమాదాలకు గురవుతున్నారు. తల్లిదండ్రుల ఏమరపాటు.. పిల్లల్ల తొందరపాటు.. మొత్తంగా ఇద్దరి పొరపాటు ఫలితం ఓ నిండు ప్రాణం.

హైదరాబాద్​ మైలార్​దేవ్​పల్లిలో ద్విచక్రవాహనాన్ని నడుపుతూ ప్రమాదానికి గురై ఎనిమిదో తరగతి చదువుతున్న బాలుడు మృతి చెందాడు. ప్రకాశం జిల్లాకు చెందిన రమణయ్య.. కుటుంబంతో సహా మైలార్​దేవ్​పల్లిలో నివసిస్తున్నాడు. మేస్త్రీ పని చేసుకునే రమణయ్య దంపతులకు ఒక్కగానొక్క కుమారుడు మణిదీప్(14 ఏళ్లు).. బుద్వేలులో ఎనిమిదో తరగతి చదువుతున్నాడు. క్యాన్సర్​ బారిన పడిన రమణయ్య గత కొంత కాలంగా మంచానికే పరిమితమయ్యాడు.

కాగా.. ఈరోజు పాఠశాలకు వెళ్లే సమయంలో పెరుగు ప్యాకెట్ తీసుకురమ్మని తల్లి మణిదీప్​కు చెప్పింది. ఓవైపు పాఠశాలకు సమయమవుతోందన్న తొందరపాటులో.. బయటకు వెళ్లిన మణిదీప్ తల్లిదండ్రులకు తెలియకుండా.. అక్కడే ఉన్న తమ ద్విచక్రవాహనం(యాక్టివా)పై దుకాణానికి వెళ్లాడు. పెరుగు ప్యాకెట్​ తీసుకుని తిరిగి ఇంటికి వచ్చే క్రమంలో.. వాహనాన్ని అదుపు చేయలేక వేగంగా వెళ్లి డివైడర్​ను ఢీకొట్టాడు. ఈ ప్రమాదంలో తలకు బలమైన గాయాలు కావడంతో మణిదీప్​ అక్కడికక్కడే మృతిచెందాడు. విషయం తెలిసి.. కుటుంబసభ్యులు బోరున విలపించారు. ఉన్న ఒక్కగానొక్క కొడుకు మృతిచెందటంతో గుండెలవిసేలా రోధించారు.

కేసు నమోదు చేసిన పోలీసులు దర్యాప్తు చేస్తున్నారు. మైనర్​లకు వాహనాలు ఇవ్వకూడదని.. అలా ఇస్తే వారి తల్లిదండ్రులపై కేసులు నమోదు చేస్తామని సీఐ నర్సింహ హెచ్చరించారు. అలా ఇవ్వటం వల్ల వారితో పాటు ఇతర వాహనదారులు కూడా ప్రమాదాల బారినపడి నిండు ప్రాణాలు కోల్పోయే అవకాశాలున్నాయని వివరించారు.

ఇదీ చూడండి: