భారీ చోరీ.. టికెట్‌ కోసం వెళ్లి వచ్చేలోపు బ్యాగ్​ మాయం

17:23 August 13

భారీ చోరీ.. టికెట్‌ కోసం వెళ్లి వచ్చేలోపు బ్యాగ్​ మాయం

నిజామాబాద్​ జిల్లా బోధన్ బస్టాండ్​లో.. నిన్న రాత్రి సినీఫక్కీలో ఘరానా దొంగతనం జరిగింది. కాపుకాసి మరీ నగలవ్యాపారి నుంచి దుండగులు బ్యాగ్​ను ఎత్తుకెళ్లారు. ఈ ఘటన ఆలస్యంగా వెలుగులోకి వచ్చింది.  

హైదరాబాద్​కు చెందిన నగల వ్యాపారి దళపత్​ సింగ్​ నుంచి 41 తులాల బంగారం, 7 కిలోల వెండి, లక్ష నగదును దోచుకెళ్లారు. బోధన్​లోని దుకాణాలకు బంగారం, వెండి ఇచ్చి తిరిగి హైదరాబాద్​ వెళ్లడానికి బస్​ ఎక్కారు. తన సీట్​లో బ్యాగ్​ను ఉంచి టికెట్​ తీసుకోవడానికి డ్రైవర్​ వద్దకు వెళ్లగానే.. అక్కడే కాపుకాసిన దుండగులు బ్యాగ్​ను ఎత్తుకెళ్లారు. గ్రహించిన బాధితుడు.. బోధన్​ పట్టణ పోలీసులను ఆశ్రయించారు.  

వెంటనే రంగంలోకి దిగిన పోలీసులు.. కేసు నమోదు చేశారు.  దొంగలముఠాను పట్టుకునేందుకు ప్రత్యేక బృందాలను రంగంలోకి దించారు.  

ఇదీచూడండి:'నేనే చంపాను.. మళ్లీ బతికిస్తాను'.. జగిత్యాలలో శవం వద్ద పూజలు