వచ్చే ఉగాది నుంచి వరంగల్ నగరంలో ఇంటింటికి తాగునీరు అందించనున్నట్టు పురపాలక శాఖ మంత్రి కేటీఆర్ వెల్లడించారు. గ్రేటర్ వరంగల్ మున్సిపల్ కార్పొరేషన్కు సంబంధించిన అంశాలపై జిల్లా మంత్రులు, ప్రజాప్రతినిధులు, అధికారులతో ఉన్నతస్థాయి సమావేశం నిర్వహించారు. కార్పొరేషన్ పరిధిలో అమలవుతున్న అభివృద్ధి, సంక్షేమ కార్యక్రమాలపైన వివిధ శాఖల ఉన్నతాధికారులతో సమీక్షించారు. ప్రతిరోజూ తాగునీరు అందించేలా అవసరమైన మౌలిక వసతుల పనులను మరింత వేగవంతం చేయాలని సూచించారు. తెలంగాణ రాష్ట్ర ప్రభుత్వం ఏర్పడిన నాటి నుంచి వరంగల్ నగరంలో తాగునీటి సరఫరాను మెరుగుపరిచేందుకు అనేక చర్యలు తీసుకున్నామన్నారు.
2048 డిమాండ్కు తగ్గట్టుగా..
నగరంలో గతంలో కేవలం 30 ఎంఎల్డీల నీటి సరఫరా ఉండగా... ప్రస్తుతం 168 ఎంఎల్డీలకు పెరిగిందని మంత్రి తెలిపారు. గతంలో ఉన్న 1,400 కిలోమీటర్ల పైపులైన్లకు అదనంగా ఇప్పటికే 1,400 కిలోమీటర్లు పైప్లైన్ నిర్మాణం పూర్తయిందని, మరో 500 కిలోమీటర్లు త్వరలో పూర్తి చేయనున్నట్టు వివరించారు. మిషన్ భగీరథ ద్వారా సుమారు వెయ్యి కోట్ల రూపాయలతో చేపట్టిన పనులన్నీ వచ్చే ఉగాది నాటికి పూర్తవుతాయన్నారు. 2048 వరకు డిమాండ్ను తట్టుకునేలా ప్రస్తుతం నగరంలో తాగునీటి సరఫరా బలోపేతం కోసం పనులు చేపట్టినట్టు అధికారులు మంత్రికి వివరించారు.
రూపాయికి కనెక్షన్..
నీటి సరఫరా వ్యవస్థ బలోపేతం కోసం అవసరమైన 200 మందిని నేషనల్ అకాడమీ ఆఫ్ కన్స్ట్రక్షన్ సహాయంతో వెంటనే నియమించాలని అధికారులను కేటీఆర్ ఆదేశించారు. నగరంలో ప్రతిరోజు తాగునీరు అందించేందుకు అవసరమైన ప్రణాళికను రూపొందించి, అమలు పూర్తి చేసే వరకు మున్సిపల్ ఇంజనీరింగ్ ఈఎన్సీ, ఇతర ఉన్నతాధికారులు ప్రతి వారం వెళ్లి పనుల పురోగతిని సమీక్షించాలని సూచించారు. నగరంలో సుమారు లక్షా 70 వేల గృహాలకు నల్లా కనెక్షన్ ఉండగా... మిగిలిన గృహాలకు కూడా సాధ్యమైనంత త్వరగా కనెక్షన్లు ఇవ్వాలని తెలిపారు. ఒక రూపాయికి కనెక్షన్ తీసుకునేలా ప్రజలను చైతన్యవంతం చేస్తూ వివిధ కార్యక్రమాలు చేపట్టాలన్న మంత్రి... నగర ప్రజాప్రతినిధులు ఇందుకు సంబంధించి బాధ్యత తీసుకోవాలని సూచించారు.