ఉమ్మడి పాలమూరులో 300 దాటిన కరోనా కేసుల సంఖ్య

ఉమ్మడి పాలమూరులో కరోనా మహమ్మారి విస్తరిస్తోంది. బాధితుల సంఖ్య 300 దాటగా... ఇప్పటివరకు వైరస్​ బారిన పడి 21 మంది మృతిచెందారు.

మహబూబ్‌నగర్‌ జిల్లాలో కరోనా వ్యాప్తి రోజురోజుకు పెరుగుతూనే ఉంది. ఉమ్మడి జిల్లాలో వైరస్​ కేసులు 300 దాటగా... 21 మంది వైరస్​తో మృతి చెందారు. మంగళవారం మరో 13 మందికి కొవిడ్​ నిర్ధరణ కాగా అత్యధికంగా మహబూబ్‌నగర్‌ జిల్లాలో 137 కేసులు నమోదయ్యాయి. గద్వాలలో 66, వనపర్తిలో 41, నాగర్‌కర్నూల్​లో 38, నారాయణపేటలో 20 కేసులు వెలుగుచూశాయి. ఉమ్మడి జిల్లాలో కేసుల సంఖ్య 303కు చేరింది. మహబూబ్‌నగర్ జిల్లాలో 7 కేసులు నమోదు కాగా.. వాటిలో 5 పట్టణానికి చెందినవే.

జోగులాంబ గద్వాల జిల్లాలో 4 పాజిటివ్‌ కేసులు నమోదయ్యాయి. వనపర్తి జిల్లాలో 2 కరోనా పాజిటివ్‌ కేసులు బయటపడ్డాయి. నారాయణపేట జిల్లా మక్తల్‌ మండలంలోని ఓ గ్రామానికి చెందిన ప్రజాప్రతినిధి కరోనాతో మృతి చెందారు. ఇటీవల అనారోగ్య సమస్యలతో హైదరాబాద్‌లోని ఓ ఆసుపత్రిలో చేర్పించగా.. పరీక్షలు నిర్వహించగా పాజిటివ్‌ అని తేలింది. చికిత్స పొందుతూ ఆయన మంగళవారం మృతి చెందారు. నాగర్‌కర్నూల్‌ జిల్లాలో ఇవాళ కరోనా కేసులు నమోదు కాలేదు.

ఇవీ చూడండి:రాష్ట్రంలో మరో 1879 మందికి కరోనా.. 27,612కి చేరిన కేసులు