NSUI PRESIDENT: 'గాడిద దొంగతనం' కేసులో కాంగ్రెస్ నేత బల్మూరి వెంకట్ అరెస్ట్..

NSUI PRESIDENT: కరీంనగర్​ జిల్లా హుజూరాబాద్​లో నిన్న(ఫిబ్రవరి 17న) అర్ధరాత్రి సమయంలో ఎన్​ఎస్​యూఐ రాష్ట్ర అధ్యక్షుడు బల్మూరి వెంకట్​ను పోలీసులు అదుపులోకి తీసుకున్నారు. గాడిదను దొంగతనం చేశాడని వచ్చిన ఫిర్యాదు మేరకు పోలీసులు కేసు నమోదు చేసి అరెస్ట్​ చేశారు.

NSUI PRESIDENT: ఎన్​ఎస్​యూఐ రాష్ట్ర అధ్యక్షుడు బల్మూరి వెంకట్​ను కరీంనగర్​ జిల్లా జమ్మికుంటలో పోలీసులు అరెస్ట్​ చేశారు. నిన్న(ఫిబ్రవరి 17న) సీఎం కేసీఆర్​ జన్మదినం సందర్భంగా.. కరీంనగర్​లోని శాతవాహన యూనివర్సిటీలో గాడిదకు కేసీఆర్​ చిత్రపటం వేసి ఎన్​ఎస్​యూఐ నాయకులు నిరసన వ్యక్తం చేశారు. గాడిదను బల్మూరి వెంకట్​ దొంగిలించాడని జమ్మికుంట పోలీస్​స్టేషన్​లో తెరాస నేత ఫిర్యాదు చేశారు. 143, 153, 504, 379, 149 ఐపీసీ సెక్షన్​, సెక్షన్​ 67 ఐటీ యాక్ట్​, సెక్షన్​ 11 కింద కేసు నమోదు చేసిన పోలీసులు.. బల్మూరి వెంకట్​ను అర్ధరాత్రి సమయంలో అదుపులోకి తీసుకున్నారు. జూపాకలో సమ్మక్క, సారలమ్మను దర్శించుకొని హూజూరాబాద్​లోని తన నివాసానికి వెళ్తుండగా వెంకట్​ను పోలీసులు అదుపులోకి తీసుకున్నారు.

పోలీసుల ఎఫ్​ఐఆర్​ పత్రం

వెంకట్​ అసంతృప్తి..

అర్ధరాత్రి సమయంలో ముందస్తు సమాచారం లేకుండా అదుపులోకి తీసుకోవడంపై బల్మూరి వెంకట్​ అసంతృప్తి వ్యక్తం చేశారు. రాహుల్​ గాంధీపై అనుచిత వ్యాఖ్యలు చేసిన అసోం సీఎం హిమంత బిశ్వశర్మపై.. రాష్ట్ర వ్యాప్తంగా అన్ని పోలీస్​స్టేషన్లలో ఫిర్యాదులు చేసినా పట్టించుకోని పోలీసులు.. తెరాస నేతలు తనపై ఆధారాలు లేకుండా ఫిర్యాదు చేస్తే ఎలా అదుపులోకి తీసుకుంటున్నారని మండిపడ్డారు.

ఇవాళ ఉదయం... బల్మూరి వెంకట్​ను వెంటనే విడుదల చేయాలంటూ జమ్మికుంట పోలీస్​స్టేషన్​ వద్ద కాంగ్రెస్​ శ్రేణులు ఆందోళన చేపట్టారు. ఆందోళనకారులను అదుపులోకి తీసుకున్న పోలీసులు.. ఇల్లందకుంట పీఎస్​కు తరలించారు.

ఇదీచూడండి:KCR Birthday Celebrations: ఘనంగా కేసీఆర్​ పుట్టినరోజు.. రాష్ట్రవ్యాప్తంగా సంబురాలు