చిన్నారుల స్థాయిని పెంచిన రచయిత 'హకీం జానీ'

తెలుగు భాషపై మమకారం ఆయణ్ని రచనల వైపు నడిపింది. బాలసాహిత్యంతో భావితరాల్ని బాధ్యతాయుత పౌరులుగా మార్చొచ్చన్న ఆలోచనతో... ఆయన కలం నుంచి వెయ్యికిపైగా వ్యాసాలు, 50కి పైగా రచనలు జీవం పోసుకున్నాయి. ఆయన రచనలు మహారాష్ట్రలో తెలుగు మాధ్యమ విద్యార్థులకు పాఠ్యాంశాలుగానూ ఎంపికయ్యాయి.

ఏపీలోని గుంటూరు జిల్లా తెనాలికి చెందిన హకీం జానీ... ఓ ప్రైవేటు పాఠశాలలో తెలుగు ఉపాధ్యాయునిగా పనిచేస్తున్నారు. మాతృభాషపై మక్కువతో పాతికేళ్లుగా సాహితీ సేవ చేస్తున్నారు. ఉపాధ్యాయునిగా వృత్తిని.. రచయితగా ప్రవృత్తిని రెండు కళ్లుగా చేసుకుని ముందుకు సాగుతున్నారు. బాలసాహిత్యంలో ఆయనది అందెవేసిన చేయి. ఇప్పటివరకు రాసిన 65 పుస్తకాల్లో 30 చిన్నపిల్లల కోసమే రాశారు. చిన్నారులకు అవగతమయ్యేలా సరళమైన భాష, పొందికైన పదాలతో ఈయన రచనలు ఉంటాయి.

జాతీయ నాయకుల జీవితకథలు, స్ఫూర్తినిచ్చే ప్రముఖులు, శాస్త్రవేత్తల గురించి పుస్తకాలు రాశారు. 30కి పైగా నీతి కథలతో 'అమ్మఒడి' అనే పుస్తకం రాశారు. ఇందులోని రెండు కథలు మహారాష్ట్రలో తెలుగు మాధ్యమం విద్యార్థులకు పాఠ్యాంశంగా 2019లో ఎంపికయ్యాయి. 'బాధ్యతాయుత పౌరులు' అనే కథను ఈ ఏడాది 11వ తరగతిలో.. 'కొత్తవెలుగు' అనే కథను 12వ తరగతి పుస్తకాల్లో పాఠంగా చేర్చారు. దీనిపై హకీంజానీ సంతోషం వ్యక్తం చేశారు.

నీతి కథల ద్వారా పిల్లల్లో నైతిక విలువలు, భాష పట్ల మక్కువ పెరుగుతాయని నమ్మే హకీం జానీ... తన రచనల్లో వాటికే ప్రాధాన్యం ఇస్తారు. పిల్లల కోసం నిర్వహించిన కేంద్ర సాహిత్య అకాడమీ కార్యశాలలో పాల్గొని విలువైన సూచనలు చేశారు. బాలసాహిత్యం అంటే పిల్లల స్థాయికి దిగి రాయడం కాదని.... వారి స్థాయికి ఎదిగి రాయడమంటారు హకీం జానీ. వయోజన విద్య కోసం 29 పుస్తకాలు రాసిన హకీం జానీని 2007లో 'తెలుగు విశ్వవిద్యాలయం ధర్మనిధి' పురస్కారం వరించింది. పర్యాటకంపై రాసిన పుస్తకాలకుగానూ 2011, 2018లో ఏపీ పర్యాటక శాఖ నుంచి ఉత్తమ రచయిత పురస్కారాలు దక్కాయి.

ఇదీ చదవండీ...భారత్​లో విదేశీ విద్యకు పెద్దపీఠ