WATER DISPUTES: కేసీఆర్​కు కేంద్రజలశక్తి మంత్రి ఫోన్​.. 'రాయలసీమ'కు కృష్ణాబోర్డు బృందం

తెలుగు రాష్ట్రాల మధ్య కృష్ణా జలాల పంపకంపై వాగ్యుద్ధం జరుగుతున్న నేపథ్యంలో కీలక పరిణామం చోటుచేసుకొంది. ముఖ్యమంత్రి కేసీఆర్​తో కేంద్ర జలశక్తి శాఖ మంత్రి గజేంద్రసింగ్​ షెకావత్​ ఫోన్​లో మాట్లాడారు. రాయలసీమ ఎత్తిపోతల ప్రాంతానికి కృష్ణా బోర్డు బృందాన్ని పంపుతామని చెప్పారు. ఏపీ ప్రభుత్వం ఎత్తిపోతల పథకం పనులను కొనసాగిస్తుందా లేదా అన్న విషయమై నిజనిర్ధారణ చేయిస్తామని వెల్లడించారు.

రాయలసీమ ఎత్తిపోతల పథకం పనులను ఆంధ్రప్రదేశ్ ప్రభుత్వం కొనసాగిస్తుందా లేదా అన్న విషయమై నిజనిర్ధారణ చేయిస్తామని కేంద్ర జలశక్తి శాఖ మంత్రి గజేంద్రసింగ్ షెకావత్ తెలిపారు. తెలంగాణ, ఆంధ్రప్రదేశ్ మధ్య రాయలసీమ ఎత్తిపోతల పథకం వివాదం, ఎన్జీటీ తీర్పు సహా తాజా పరిణామాల నేపథ్యంలో కేంద్ర మంత్రి షెకావత్ ముఖ్యమంత్రి కేసీఆర్​తో ఫోన్లో మాట్లాడారు. అనుమతులు లేకుండా ప్రాజెక్టు పనులు జరగకుండా చర్యలు తీసుకుంటామని కేంద్ర మంత్రి హామీ ఇచ్చినట్లు తెలిసింది. ఎన్జీటీ ఆదేశాలకు అనుగుణంగా నిజనిర్ధారణ కోసం రాయలసీమ ఎత్తిపోతల పథకం ప్రాంతానికి కృష్ణా నదీ యాజమాన్య బోర్డు బృందాన్ని పంపిస్తామని చెప్పినట్లు సమాచారం. వీలైనంత త్వరగా బోర్డు బృందం అక్కడకు వెళ్లి పనుల వాస్తవ స్థితిపై నివేదిక ఇస్తుందని.. కేసీఆర్​తో షెకావత్​ చెప్పినట్లు తెలిసింది.

తెలంగాణ వాదన..

తెలుగురాష్ట్రాల మధ్య జల వివాదం మరోసారి తెరపైకి వచ్చింది. ఈ విషయంపై ఇరు రాష్ట్రాల మంత్రుల మద్య మాటల తూటాలు పేలుతున్నాయి. నీటి వాటాలు తేలేవరకు రాయలసీమ ఎత్తిపోతల పనులు నిలుపుదల చేస్తామని నాడు జరిగిన అపెక్స్​ కౌన్సిల్​ భేటీలో ఏపీ ముఖ్యమంత్రి మాట ఇచ్చారని.. తెలంగాణ మంత్రులు చెబుతున్నారు. సుప్రీంలో తెలంగాణ వేసిన వ్యాజ్యాన్ని ఉపసంహరించుకొంటే.. బ్రిజేష్​కుమార్​ తీర్పు త్వరగా వచ్చాలా చూస్తామని.. ఏపీ అధికారులు చెప్పారన్నారు. ఇప్పుడు కృష్ణా నీటిని అక్రమంగా తరలించేందుకు ఏపీ యత్నిస్తోందని ఆరోపించారు. ఎన్టీటీ ఆదేశాలు పాటించకుండా రాయలసీమ ఎత్తిపోతల పనులు చేపడుతున్నారని.. కృష్ణా బోర్టుకు లేఖ రాశారు.

ఏపీ వాదన..

అయితే ఈ వివాదంపై ఏపీ జలవనరుల శాఖ మంత్రి అనిల్​కుమార్​ కూడా స్పందించారు. కృష్ణానది నీటిని తరలించేందుకు ఆంధ్రప్రదేశ్‌ అక్రమ ప్రాజెక్టులు కడుతోందన్న తెలంగాణ ఆరోపణలను కొట్టి పారేశారు. రాయలసీమలో కడుతున్న ప్రాజెక్టులన్నీ చట్టానికి లోబడినవేనని స్పష్టం చేశారు. తమకు కేటాయించిన నీటికి మించి చుక్క నీరు కూడా అదనంగా తీసుకోవడం లేదన్నారు. 6 టీఎంసీలకు పైగా సామర్థ్యమున్న పలు ప్రాజెక్టులను తెలంగాణ అనుమతి లేకుండా నిర్మిస్తోందని ఆరోపించారు. పోతిరెడ్డిపాడు వద్ద లిఫ్ట్‌ పెడితే.. తప్పెలా అవుతుందో తెలంగాణ చెప్పాలని డిమాండ్‌ చేశారు.

ఈ వివాదాల నేపథ్యంలో తెలంగాణ ప్రభుత్వం సైతం కీలక నిర్ణయం తీసుకొంది. కృష్ణానదిపై మరో ఆనకట్టు కట్టేందుకు ఇటీవల మంత్రివర్గంలో అనుమతిచ్చింది. దీనిపై సర్వే కోసం గురువారం అనుమతులు జారీచేసింది.

జైలుకు పంపుతాం..

ఏపీపై తెలంగాణ చేసిన ఫిర్యాదుపై జాతీయ హరిత ట్రైబ్యునల్​ కీలక ఆదేశాలు జారీ చేసింది. తమ ఆదేశాలను ధిక్కరిస్తే ఏపీ సీఎస్​ను జైలుకు పంపుతామంటూ తీవ్ర ఆగ్రహం వ్యక్తం చేసింది.

సంబంధిత కథనాలు..