హైదరాబాద్ ఎల్బీనగర్‌లోని సాహెబ్నగర్‌లో మురుగునీటిని శుభ్రపరిచేందుకు మ్యాన్హోల్ లోకి దిగి గల్లంతయిన కార్మికుడి ఆచూకీ కోసం గాలింపు చర్యలు ముమ్మరం చేశారు. చంపాపేట్ చింతలబస్తీకి చెందిన కార్మికులు శివ, అంతయ్య మురుగునీటిని శుభ్రపరిచేందుకు మంగళవారం రాత్రి.... మ్యాన్ హోల్లోకి దిగారు. ఒకరి తర్వాత ఒకరు దిగి ఊపిరి ఆడక గల్లంతయ్యారు. శివ మృతదేహం వెలికి తీయగా.. అంతయ్య ఆచూకీ ఇంకా లభించలేదు. అంతయ్య డ్రైనేజీ లైన్లో మరింత కిందకు కొట్టుకుపోయి ఉంటాడని అధికారులు భావిస్తున్నారు.
చేయని ప్రయత్నం లేదు..
అంతయ్య ఆచూకీ కోసం జీహెచ్‌ఎంసీ అధికారులు చేయని ప్రయత్నమంటూ లేదు. మూడు రోజులుగా సాహెబ్‌నగర్‌లోని ఘటనా స్థలంలో సహాయ చర్యలు కొనసాగుతున్నాయి. స్థానికంగా ఉన్న పలు మ్యాన్‌హోళ్ల వద్ద 150 అడుగులకు పైగా ఇప్పటికే తవ్వారు. మట్టిని గుట్టలుగా కాలనీలో పోశారు. ప్రొక్లెయినర్లు, మురుగునీటిని తొలగించే యంత్రాలతో సహాయ చర్యలు సాగుతున్నప్పటికీ అంతయ్య జాడ మాత్రం కనిపించడం లేదు.
గుత్తేదారుల నిర్లక్ష్యంతోనే..
జీహెచ్‌ఎంసీ అధికారులు, గుత్తేదారు నిర్లక్ష్యం కారణంగానే శివ మృతి చెందగా... అంతయ్య గల్లంతయ్యాడని బాధిత కుటుంబసభ్యులు ఆరోపిస్తున్నారు. రాత్రి వేళ కార్మికులను మురుగు శుభ్రం చేసేందుకు మ్యాన్‌హోళ్లలోకి దించకూడదనే నిబంధనలు ఉన్నప్పటికీ గుత్తేదారు ఒత్తిడితోనే వారిద్దరు దిగాల్సివచ్చిందని బాధిత బంధువులు చెబుతున్నారు. అంతయ్య జాడ కనుగొనడంలో జీహెచ్‌ఎంసీ అధికారులు నిర్లక్ష్యంగా వ్యవహరిస్తున్నారనే ఆరోపణలు వెల్లువెత్తుతున్నాయి.
'ఆరోజు రాత్రి సమయంలో పని ఉందని చెప్పి మా వాళ్లను తీసుకెళ్లారు. అక్కడ మ్యాన్హోల్ ఎంత ఉందో చెప్పలేదు. తొందరపెట్టి అందులోకి దింపేశారు. మొదటగా శివ దిగాడు. ఆయన ఒక్కడితో కాకపోవడం వల్ల సాయం చేద్దామని అంతయ్య కూడా వెళ్లాడు. చెయ్యిపట్టుకుని పైకి లాగుతున్న సమయంలో ఇద్దరు అందులోనే పడిపోయారు. ఘటన జరిగినప్పుడు కాంట్రాక్టర్లు అందరూ అక్కడే ఉన్నారంట. వాళ్లను బయటకు ఎలా తీయాలో ఆలోచించకుండా.. ఎట్లా తప్పించుకోవాలా అని చూశారు. పడిపోయిన గంట తర్వాత మాకు ఫోన్ చేసి చెప్పారు. గంటపాటు ఎటువంటి చర్యలు తీసుకోలేదు. మేము వచ్చేసరికి ఒక్కరి మృతదేహం దొరికింది. అంతయ్యది కనిపించలేదు.