నకిలీ ధ్రువపత్రాల కేసులో ఇద్దరు అరెస్టు

సికింద్రాబాద్​లో నకిలీ ధ్రువపత్రాలు తయారు చేస్తున్న ఇద్దరు వ్యక్తులను పోలీసులు అరెస్టు చేశారు. గత కొంతకాలంగా ఆర్థిక సమస్యలతో సతమతమైన నిందితుడు.. సులువుగా డబ్బు సంపాదించేందుకు ఈ మార్గాన్ని ఎంచుకున్నట్లు పోలీసులు వెల్లడించారు.

ఆర్మీ ఉద్యోగుల రుణాల కోసం అవసరమైన సర్వీసు ధ్రువపత్రాలను అందిస్తామని నమ్మించి నకిలీ పత్రాలను తయారు చేస్తున్న ఇద్దరు వ్యక్తులను రాజధాని పోలీసులు అరెస్టు చేశారు. సికింద్రాబాద్ రసూల్​ పురాకు చెందిన నరేశ్​ ఫ్రీ లాన్సర్ ఏజెంట్​గా పని చేస్తూ ఈ తరహా నేరాలకు పాల్పడుతున్నట్లు గుర్తించారు. కొంత కాలంగా ఆర్థిక సమస్యలతో సతమతమైన నిందితుడు.. సులువుగా డబ్బు సంపాదించేందుకు ఈ మార్గాన్ని ఎంచుకున్నాడు.

నకిలీ పత్రాలు ​
బ్యాంకు రుణాల కోసం దరఖాస్తు చేసుకున్న వారికి అవసరమైన ధ్రువపత్రాలను అందిస్తామని ప్రకటనలు ఇచ్చినట్లు పోలీసులు తెలిపారు. వారికి రుణం ఇప్పించేందుకు డబ్బులు మాట్లాడుకుని అందుకు అవసరమైన నకిలీ పత్రాలను సృష్టించేవారు. దీనికి సంబంధించిన స్టాంపులను కూడా ఓ వ్యక్తి వద్ద తయారు చేయించినట్లు వెల్లడించారు. ఈముఠా కదలికలపై అనుమానం వచ్చిన కొంతమంది ఆర్మీ సిబ్బంది.. నిఘా పెట్టి టాస్క్ ఫోర్స్, కార్ఖానా పోలీసుల సాయంతో పట్టుకున్నారు. మరో నిందితుడు అనిల్ కుమార్ పరారీలో ఉన్నాడు.