హైదరాబాద్ విద్యుత్ సౌధలో ట్రాన్స్‌కో, జెన్‌కో సీఎండీ ప్రభాకర్‌రావును టీఆర్‌వీకేఎస్‌ రాష్ట్ర అధ్యక్ష, కార్యదర్శులు కేవీ జాన్సన్, కోడూరు ప్రకాశ్‌లు కలిశారు. ఈ నెల 7న అసెంబ్లీలో సీఎం కేసీఆర్‌ రాష్ట్రంలో విద్యుత్ ఉత్పత్తి.. సరఫరాలో విద్యుత్ ఉద్యోగుల కృషి ఎంతో ఉందని కొనియాడారు. ఈ సందర్భంగా విద్యుత్ ఉద్యోగులందరినీ సీఎండీ ప్రభాకర్‌రావు అభినందించారు. ఈ విజయం మనందరి సమష్టి విజయమని ఆయన అన్నారు.
ఈ క్రమంలోనే విద్యుత్ ఉద్యోగులు సీఎండీ ప్రభాకర్‌రావును సన్మానించారు. అనంతరం విద్యుత్ ఉద్యోగుల పీఆర్సీ, ఈపీఎఫ్‌ నుంచి జీపీఎఫ్, ఆర్టిజన్ సమస్యలు, ఎన్పీడీసీఎల్ ప్రమోషన్ల గురించి సీఎండీ దృష్టికి తీసుకెళ్లారు. దీనిపై స్పందించిన ప్రభాకర్‌రావు.. పీఆర్సీ అమలులో భాగంగా ఈ నెలాఖరులో అన్ని విద్యుత్ సంఘాల వారిని చర్చలకు పిలుస్తామని చెప్పారు. అప్పుడే ఈపీఎఫ్‌, ఆర్టిజన్ సమస్యలు పరిష్కరిస్తామని ఆయన తెలిపారు. అదేవిధంగా ఎన్పీడీసీఎల్‌లో రాష్ట్ర ప్రభుత్వం ఆదేశాలకు అనుగుణంగా ప్రమోషన్లు అమలు చేయాలని ఎన్పీడీసీఎల్ సీఎండీకి త్వరలోనే ఉత్తరం రాస్తామని ప్రభాకర్‌రావు వారికి హామీ ఇచ్చారు.