తెలంగాణపై సవతి తల్లి ప్రేమే చూపిస్తున్నారు: తెరాస ఎంపీలు

కేంద్ర బడ్జెట్​పై తెరాస స్పందించింది. రాష్ట్ర డిమాండ్లపై ఎన్నిసార్లు విన్నవించిన కనీస కేటాయింపులు చేయలేదన్నారు. కొత్త రాష్ట్రానికి చేయూతనందివ్వాల్సి ఉండగా.. సవతి తల్లి ప్రేమ చూపించినట్లుగా వ్యవహరిస్తున్నారని ఎంపీలు కొత్త ప్రభాకర్​ రెడ్డి, రంజిత్​ రెడ్డి మండిపడ్డారు.

కేంద్ర పద్దుపై మెదక్​ ఎంపీ కొత్త ప్రభాకర్​ స్పందించారు. కాళేశ్వరానికి జాతీయ హోదా ప్రకటించకపోవడం, నిధులు కేటాయించకపోవడంపై అసంతృప్తి వ్యక్తం చేశారు. అక్కన్నపేట రైల్వే ప్రాజెక్టు, సికింద్రాబాద్​- కరీంనగర్​ రైల్వే ప్రాజెక్టుపై బడ్జెట్​లో ప్రస్తావన లేకపోవడం దారుణమన్నారు. మత్య్సకారులకు 'సాగర్​ కాంత్రి' పేరుమీద నూతన పథకం తీసుకొచ్చారని.. కానీ తెలంగాణలో ఇప్పటికే ఉచిత చేపలు, గొర్రెల పంపిణీ కార్యక్రమం అమలు చేస్తున్నట్లు తెలిపారు. ఎయిమ్స్​, ఐఐటీపైనా ఎటువంటి ప్రస్తావన లేకపోవడం ఆవేదన కలిగించిందన్నారు. అత్యధిక పర్యాటక కేంద్రాలున్న తెలంగాణ రాష్ట్రానికి నిధులు ప్రస్తావనే లేదన్నారు. ఈ పద్దుతో తెలంగాణపై భాజపా ప్రభుత్వం సవతి తల్లి ప్రేమ చూపిస్తోందని అర్థమవుతుందన్నారు.

కేంద్ర పద్దులో అంకెల గారడీ తప్ప మరేమీ లేదని చెవేళ్ల ఎంపీ రంజిత్​రెడ్డి అన్నారు. సుస్థిరాభివృద్ధికి సంబంధించిన 16 అంశాల్లో తెలంగాణ ముందంజలో ఉన్నా.. అందుకు తగ్గ నిధులు ఇవ్వలేదన్నారు. 5 ట్రిలియన్​ డాలర్ల ఆర్థిక వ్యవస్థగా మారాలంటే అంకెల గారడి కాదు... పటిష్టమైన విధానాలు అమలు చేయాలని సూచించారు.

ఇవీచూడండి:ఆ ఐదు ఉంటే దేశం అభివృద్ధి చెందినట్టే: నిర్మల