అప్పుడప్పుడే తెల్లవారుతోంది. కమ్ముకున్న పొగమంచును చీల్చుకుంటూ ఓ బృందం సన్నద్ధమైంది. రయ్ మంటూ వారి బైక్‌లు పల్లెల దిశగా సాగాయి. పచ్చనిపొలాలు... హాయిని పంచే ప్రకృతి.. సెలవు రోజుని ఆనందంగా గడిపేందుకు ఇంతకంటే ఏం కావాలి..? వెంటనే తమ కెమెరాలకు పని చెప్పింది ఈ బృందం. చకచకా ఫొటోలు తీస్తూ... ఆ ఉదయాన్ని ఎంతో ఉల్లాసంగా..ఉత్సాహంగా ఆహ్వానించింది.
- వీరందరినీ ఏకం చేసిన ఫొటోగ్రఫీ క్లబ్ ఏపీలోని తిరుపతి
వారాంతాలు వచ్చాయంటే... ఇలా ఒక్కటై ప్రకృతి ఒడిలోనే గడిపేస్తారు. వీరిలో ఇంజనీర్లు, వైద్యులు, విద్యార్థులు..ఇలా భిన్న నేపథ్యాలకు చెందిన వారున్నారు. అయినా..వీరందరి ప్రవృత్తి మాత్రం ఫొటోగ్రఫీయే. వయసు, వృత్తితో సంబంధం లేకుండా ఈ అభిరుచి ఉన్న వాళ్లు వీరితో పాటు విహార యాత్రలు చేసేందుకు ఆసక్తి చూపుతున్నారు. తమకు నచ్చిన విధంగా ఫొటోలు తీయటం..వాటిని డాక్యుమెంటరీలుగా మలచటమే వీరు చేసే పని. ఆ లక్ష్యమే వీరందిరినీ ఏకం చేసింది.
- విభిన్న రకాలు ఫొటోగ్రఫీల్లో రాణిస్తూ..
స్ట్రీట్, ఆస్ట్రో, నేచర్, ఫుడ్, ఫైన్ ఆర్ట్స్, లాండ్ స్కేప్, వైల్డ్ లైఫ్ అంటూ విభిన్న రకాల ఫొటోగ్రఫీల్లో రాణిస్తున్న వారున్నారు. ఇలా తలో దారిలో ప్రయాణాన్ని ప్రారంభించిన వారికి ఒకే వేదిక కల్పిస్తే ఎలా ఉంటుంది...? ఈ ఆలోచనే చేశారు అవినాష్, హనీష్. వైద్య విద్యను అభ్యసిస్తున్న అవినాష్, ఫైన్ ఆర్ట్స్ ఫొటోగ్రాఫర్గా పేరు తెచ్చుకున్న హనీష్.. ఏడాది క్రితం ఫొటోగ్రఫీ క్లబ్ తిరుపతిని ప్రారంభించారు. ఔత్సాహిక, ప్రొఫెషన్ల ఫొటోగ్రాఫర్లను ఒక్క చోట చేర్చేలా ఓ వేదిక ఏర్పాటు చేశారు. తరచూ ఫొటో వాక్ లు, వర్క్ షాప్ లు నిర్వహిస్తుంటారు. ఈ క్రమంలోనే...ఈ వారాంతపు ఫొటోగ్రఫీకి శ్రీకారం చుట్టారు.
- ఒత్తిడిని దూరం చేసేలా...
దైనందిన ఒత్తిడిని దూరం చేసేలా వారాంతాల్లో యాత్రలు నిర్వహించాలనే ఆలోచన చేసిన సమయంలోనే కరోనా విజృంభించింది. ఫలితంగా...దాదాపు ఎనిమిది నెలలపాటు ఇంటికే పరిమితమైపోయారు. ఇన్నాళ్ల తర్వాత తిరిగి ఈ బృంద సభ్యులంతా కలుసుకున్నారు. అందమైన ప్రాంతాలను సందర్శించటంతో పాటు పరిసర గ్రామాల ప్రజలతో ఆనందంగా గడిపారు. పల్లె వాసులతో మాట్లాడుతూనే...అక్కడి వాతావరణాన్ని ప్రతిబింబించేలా ఫొటోలు తీయటం వీరి ప్రత్యేకత. ఇక పక్షులు, పచ్చని పొలాలు, లేగదూడలు... ఇలా అన్నింటినీ తమ కెమెరాల్లో బంధిస్తూ...ముందుకు సాగిపోతుంటారు.
ప్రకృతి కలిగించే ప్రశాంతతే వేరు