వినాయక చవితి దగ్గరపడిందంటే చాలు అందరి దృష్టి ఖైరతాబాద్పై పడుతుంది. ఎంత ఎత్తులో, ఏ ఆకారంలో విగ్రహాన్ని తయారు చేస్తున్నారని ఎదురు చూస్తుంటారు. విగ్రహం తయారీ దగ్గరి నుంచి నిమజ్జనం వరకూ అన్ని ప్రత్యేకతలు సంతరించుకునే ఖైరతాబాద్ ఏకదంతుడు... ఈసారి మాత్రం అన్ని ఆర్బాటాలకు దూరంగా ఉండనున్నాడు. ఈ ఏడాది ఊహించని రీతిలో కరోనా మహమ్మారి విజృంభిచటం వల్ల ఈ ప్రభావం ఖైరతాబాద్ మహా గణనాథునిపై పడింది.
కోల్కతా కళాకారులతో విగ్రహం తయారీ
సాధారణ రోజుల్లో ఇప్పటికే దాదాపు విగ్రహం తయారీ పూర్తయి... కళాకారులు తుది మెరుగులు దిద్దుతూ ఉండేవారు. కొవిడ్ ప్రభావంతో ఉత్సవ కమిటి ఈ ఏడాది ఖైరతాబాద్ గణనాధుని ప్రతిష్ఠపై మల్లగుల్లాలు పడింది. ప్రభుత్వానికి పలు వినతులు చేసింది. చివరకు 9అడుగులు విగ్రహాన్ని ఏర్పాటు చేసేందుకు ప్రభుత్వం అంగీకారం తెలిపింది. ఊరేగింపులకు కూడా అనుమతులు లేకపోవటం వల్ల మట్టి విగ్రహాన్ని తయారు చేసి... ప్రతిష్ఠించిన చోటే నిమజ్జనం చేయాలని ఉత్సవ కమిటి నిర్ణయించింది. విగ్రహ తయారికి ఈసారి కోల్కతాకు చెందిన కళాకారులు రాగా... ఈరోజు తొలి పూజతో విగ్రహ తయారి పనులను ప్రారంభించారు.
ఆన్లైన్లో వీక్షించే సౌకర్యం..!
కరోనా మహమ్మారిని అంతం చేసేందుకు ధన్వంతరీ అవతారంలో గణనాథుడు దర్శనం ఇవ్వబోతున్నారని అర్చకులు చెబుతున్నారు. శ్రీ మహావిష్ణువు మరో రూపమే ధన్వంతరీ అని తెలిపారు. విగ్రహానికి కుడివైపున లక్ష్మీదేవి, ఎడమ వైపున సరస్వతి దేవిని ప్రతిష్ఠిస్తున్నట్లు వెల్లడించారు. కరోనా ప్రబలే అవకాశం ఉన్నందున భక్తులెవరూ మండపం వద్దకు రావొద్దని కోరింది. అయితే గణేషుడిని ఆన్లైన్లో చూసేందుకు ఉత్సవ కమిటి ఏర్పాట్లు చేస్తోందని నిర్వాహకులు వివరించారు.