ఏపీలోని విజయవాడ ఇంద్రకీలాద్రిపై అవినీతి నిరోధక శాఖ ఐదు రోజుల పాటు చేసిన తనిఖీల్లో.. అవినీతి, అక్రమాల డొంక కదిలింది. అనిశా అధికారులు దుర్గగుడిలోని కీలకమైన విభాగాలన్నింటిలోనూ లోతుగా పరిశీలించారు. కొండపై జరుగుతున్న లోపాలను గుర్తించి.. ప్రాథమిక నివేదికను ప్రభుత్వానికి అందజేశారు. ప్రసాదాల కౌంటర్ల దగ్గర నుంచి ప్రారంభించి.. పరిపాలనా విభాగం వరకూ తనిఖీలు చేశారు. చీరలు విభాగం, ఇంజినీరింగ్‌, సరకులు.. ఇలా అన్నింటికి సంబంధించిన దస్త్రాలను లోతుగా పరిశీలించారు. సెక్యూరిటీ, శానిటేషన్‌ టెండర్లపై ప్రత్యేక దృష్టి సారించి తనిఖీలు చేశారు.
ఆలయానికి వచ్చే ఆదాయం, నిర్వహణ ఖర్చులు, ఉత్సవాలు, సిబ్బంది పదోన్నతులు.. ఇలా ప్రతి విషయాన్ని పరిశీలించారు. రెండు కోట్ల రూపాయల విలువైన స్క్రాప్‌ను కేవలం 40లక్షల రూపాయలకే విక్రయించినట్లు అనిశా అధికారులు గుర్తించారు. ఆలయంలోని కొంతమంది కీలక సిబ్బందిని గొల్లపూడిలోని అ.ని.శా. కార్యాలయానికి పిలిపించి ప్రశ్నించారు. అవకతవకలపై సంబంధిత సిబ్బందితో వాంగ్మూలాలు నమోదు చేసుకున్నారు.