ఏ కాయనైనా తెంపిన తరవాత ఒకరోజు గది ఉష్ణోగ్రతలో నీడలో ఉంచాలి. అనంతరం ‘మాగపెట్టే కేంద్రాల్లో’ (రైపనింగ్‌ ఛాంబర్లలో) కనీసం 2 రోజులుంచాలి. ఇందులో 100 పీపీఎం ఇథిలీన్‌ వాయువును పలు దఫాలుగా వదులుతారు. దీంతో మామిడికాయలు బంగారు వర్ణంలోకి మారతాయి. ఈ కేంద్రంలో నుంచి తీసిన తరవాత కాయలో వేడి తగ్గించడానికి మరో రోజు 20 నుంచి 22 డిగ్రీల ఉష్ణోగ్రత ఉండే శీతలగదిలో ఉంచాలి. తోటలో కోసిన రోజు నుంచి ఇలా మాగపెట్టి మార్కెట్‌కు పంపడానికి 5 రోజుల సమయం పడుతుంది. ఇంత సమయం వేచి ఉండలేక.. ఒకటీ రెండు రోజుల్లో మగ్గిపోయే ఎన్‌-రైప్‌ ప్యాకెట్ల వాడకం పెరిగింది.
ఇదీ పరిస్థితి..
* రాష్ట్రంలో మొత్తం 212 రైపనింగ్‌ ఛాంబర్లు ఉన్నాయి. వీటిని రైతులు, వ్యాపారులు పెద్దగా వాడటం లేదు. ఎక్కువగా అరటి పండ్లకే వాడుతున్నారు.
* హైదరాబాద్‌లోని గడ్డి అన్నారం మార్కెట్‌లో గతంలో మార్కెటింగ్‌ శాఖ రెండు రైపనింగ్‌ ఛాంబర్లు నిర్మించింది. వీటిలో రైతులు మామిడికాయలను ఉచితంగా పెట్టుకోవచ్చని, శాస్త్రీయంగా మాగపెడితే మంచి ధర వస్తుందని సూచించింది. రైతులెవరూ వాడుకోకపోవడంతో ప్రస్తుతం ఓ వ్యాపారికి అద్దెకిచ్చింది. ప్రస్తుతం ఎక్కువగా ఖాళీగానే ఉంటోంది.
* ఎన్‌-రైప్‌ ఆరోగ్యానికి హాని చేయదని ఉద్యాన శాఖ గతంలో ప్రకటించడంతో వినియోగం భారీగా పెరిగిందని ఓ టోకు వ్యాపారి ‘ఈనాడు’కు తెలిపారు.
* శంషాబాద్‌లోని ఓ ప్రైవేటు సంస్థ తయారుచేస్తున్న ఎన్‌-రైప్‌కు తాజాగా ‘మేధోపరమైన హక్కు’ (పేటెంట్‌) వచ్చిందని తయారీదారు కె.ఎస్‌.రవికుమార్‌ ‘ఈనాడు’కు తెలిపారు. తెలుగు రాష్ట్రాల్లో గతేడాది 36 లక్షల ప్యాకెట్లు విక్రయించామని.. ఈ సీజన్‌లో 2 కోట్లు అమ్మాలని లక్ష్యంగా పెట్టుకున్నట్లు ఆయన పేర్కొన్నారు.
ఖర్చు, సమయం ఆదా అవుతుందని..