కరోనా విషయంలో రాష్ట్రం సురక్షితంగా ఉంది: మంత్రి ఈటల

పక్క రాష్ట్రాల్లో కొవిడ్​ ఉద్ధృతి పెరుగుతున్నందున అధికారులు అప్రమత్తంగా వ్యవహరించాలని వైద్యారోగ్య శాఖ మంత్రి ఈటల రాజేందర్​ ఆదేశించారు. ఆస్పత్రులను సిద్ధంగా ఉంచాలని సూచించారు. కొవిడ్​ నిబంధనలను ప్రజలు పాటించాలని కోరారు.

కరోనా విషయంలో తెలంగాణ సురక్షితంగా ఉందని వైద్యారోగ్య శాఖ మంత్రి ఈటల రాజేందర్ అన్నారు. రాష్ట్రంలో కరోనా కేసులు అదుపులోనే ఉన్నాయన్నారు. పక్క రాష్ట్రాల్లో కరోనా కేసులు పెరుగుతున్న నేపథ్యంలో సచివాలయంలో ప్రభుత్వ ప్రధాన కార్యదర్శి సోమేశ్​కుమార్​, వైద్యారోగ్య శాఖ కార్యదర్శితో మంత్రి ఉన్నత స్థాయి సమీక్ష చేశారు. కేసులు పెరుగుతున్నందున ముందస్తుగా అప్రమత్తంగా ఉండాలని సూచించారు.

ఒకవేళ కేసులు పెరిగినా వైద్య సేవలు అందించేలా అన్ని ఆస్పత్రులను సిద్ధంగా ఉంచాలని ఈ సమావేశంలో నిర్ణయం తీసుకున్నారు. పూర్తిస్థాయిలో గచ్చిబౌలి టిమ్స్ ఆస్పత్రిని, గాంధీలో కొవిడ్ వార్డుల్లో అన్ని ఏర్పాట్లు చేయాలని సూచించారు. పీపీఈ కిట్లు, ఎన్‌-95 మాస్క్‌లు, ఔషధాలు, ఇంజక్షన్లు, టాబ్లెట్లు పూర్తి స్థాయిలో అందుబాటులో ఉంచాలని మంత్రి ఈటల ఆదేశించారు.

ఇప్పటికే రాష్ట్రంలో రోజుకు 50 వేల కరోనా నిర్ధారణ పరీక్షలు చేస్తున్నామని... ఈ సంఖ్యను మరింత పెంచాలని నిర్ణయించామన్నారు. ఆర్‌టీపీసీఆర్‌ పరీక్షలు ఎక్కువగా చేయాలని నిర్ణయం తీసుకున్నారు. రాష్ట్ర ప్రభుత్వం ఎన్ని చర్యలు తీసుకున్నా.. ప్రజల సంపూర్ణ భాగస్వామ్యంతోనే కట్టడి సాధ్యమని మంత్రి అన్నారు. వైరస్​ పట్ల నిర్లక్షంగా వ్యవహరించవద్దని సూచించారు. మాస్క్ ధరించడం, భౌతిక దూరం పాటించడం, చేతులు శుభ్రం చేసుకోవాలని కోరారు. అత్యవసరమైతే తప్ప బయటికి రావొద్దని మంత్రి విజ్ఞప్తి చేశారు.

ఇవీచూడండి:'వ్యాక్సిన్‌ వేయించుకోడానికి ప్రజలు ముందుకు రావడం లేదు'