హైదరాబాద్లో భారీ వర్షం వస్తే చాలు.. చాలా ప్రాంతాలు జలమయమైపోతాయి. ఇటీవల కురిసిన కుండపోత వానలకు ఎస్పీడీసీఎల్ పరిధిలో సుమారు 15 సబ్స్టేషన్లు, ఎన్పీడీసీఎల్ పరిధిలో 2 సబ్స్టేషన్లలోకి వరద నీరు వచ్చి చేరింది. చాలా చోట్ల స్తంబాలు విరిగిపోయాయి. మూసీ పరివాహక ప్రాంతంలో ఉన్న సుమారు రెండు వందల ట్రాన్స్ఫార్మర్లు నీటిలో కొట్టుకుపోయాయి. విద్యుత్ శాఖకు రూ.5 కోట్ల వరకు నష్టం వాటిల్లింది.
భారీ వర్షాలు కురిసినప్పుడు అపార్ట్మెంట్ల సెల్లార్లలోకి నీరు చేరుతోంది. ఫలితంగా రోజుల తరబడి విద్యుత్ సరఫరాను నిలిపివేయాల్సి వస్తోంది. అదే సమయంలో సబ్స్టేషన్లలోకి నీరు వచ్చి చేరుతుంది. దీన్ని నివారించేందుకు విద్యుత్ శాఖ అధికారులు ఓ ఉపాయాన్ని ఆలోచించారు.
భారీ వర్షాలు కురిసిన ప్రతిసారి నీటిని తోడే మోటార్లకు డిమాండ్ ఉంటుంది. సకాలంలో మోటార్లు దొరక్క సబ్స్టేషన్లలోని నీటిని తోడడం అధికారులకు సవాల్గా మారిపోతుంది. దీనిని అదిగమించేందుకు సొంతంగా సుమారు 20 డీజిల్ మోటార్లను కొనుగోలు చేసింది విద్యుత్ శాఖ. గ్రేటర్ శివారు ప్రాంతాల్లోని సరూర్నగర్ డివిజన్, అస్మాన్ ఘట్ డివిజన్, చార్మినార్ డివిజన్లోని ఫలక్నుమా, సలాల, బాలాపూర్, దుర్గం చెరువు, పల్లె చెరువు, రాజేంద్రనగర్, మొహదీపట్నం, అత్తాపూర్, టోలీచౌక్, ఇండోర్ సబ్స్టేషన్లయిన నిమ్స్, ఆర్ఆర్కోర్టు సబ్స్టేషన్లలో వీటిని అందుబాటులో ఉంచారు. ఎంత నీరు చేరినా.. వెంటనే తోడి.. విద్యుత్ పునరుద్దరణకు చర్యలు తీసుకోవచ్చని అధికారులు అభిప్రాయపడ్డారు.
ఇవీచూడండి:జల దిగ్భందమైన హయత్నగర్ సబ్ స్టేషన్
