Cyber Crime Money Recovered : హైదరాబాద్‌కు చెందిన ప్రేరణను సైబర్ నేరస్థుల ముఠా బిట్‌కాయిన్‌ పెట్టుబడుల పేరుతో మోసం చేసి పలు ఖాతాలకు రూ.11లక్షలను బదిలీ చేయించుకుంది. ఆమె జూన్‌ 18న హైదరాబాద్‌ సైబర్‌క్రైం పోలీసులతోపాటు తెలంగాణ సైబర్‌క్రైమ్‌ కోఆర్డినేషన్‌ సెంటర్(టీ4సీ)కు ఫిర్యాదు చేశారు. రంగంలోకి దిగిన టీ4సీ బృందం ఐడీబీఐ బ్యాంకు నోడల్‌ అధికారులను సంప్రదించింది. రూ.11లక్షలను మోసగాళ్లకు చిక్కకుండా ఫ్రీజ్‌ చేయించి ఆ డబ్బుని తిరిగి బాధితురాలి ఖాతాకు రప్పించారు. ఇలా ఏడాది కాలంలో టీ4సీ ఏకంగా రూ.15కోట్లకుపైగా సొమ్మును తిరిగి బాధితుల చెంతకు చేర్చింది.
Telangana Cybercrime Coordination Centre : సైబర్‌నేరాలు పెచ్చరిల్లిపోవడంతో కేంద్ర హోంశాఖ www.cybercrime.gov.in వెబ్‌సైట్‌తోపాటు హెల్ప్‌లైన్‌ నంబరు 1930ని ఏర్పాటు చేసింది. ఇదేక్రమంలో తెలంగాణ పోలీసులు టీ4సీని ఏర్పాటు చేశారు. ఈ కేంద్రంలో సిబ్బంది 24గంటలూ అందుబాటులో ఉంటుండటంతో తెలంగాణ నుంచి 1930కు వచ్చే ఫోన్‌కాల్స్‌కు వెంటనే స్పందిస్తున్నారు.