రెవెన్యూ అధికారుల విచక్షణాధికారాలకు ప్రభుత్వం కత్తెర వేసింది. పారదర్శకతకు పెద్దపీట వేసేందుకు ఆన్‌లైన్‌లోనే భూమి హక్కు పత్రం ఇచ్చేలా తెలంగాణ రాష్ట్ర భూముల(నాలా) చట్టం-2016లో సవరణలు చేసింది. రాష్ట్ర శాసనసభలో చట్ట సవరణ బిల్లును రాష్ట్ర రహదారులు-భవనాలు, శాసనసభ వ్యవహారాల మంత్రి వేముల ప్రశాంత్‌రెడ్డి మంగళవారం ప్రవేశపెట్టారు. ఇక నుంచి నిర్దిష్ట కాలవ్యవధితో వ్యవసాయ భూములను వ్యవసాయేతర భూములుగా మార్చుకునేందుకు చట్టంలో వెసులుబాటు కల్పించారు. ఆ సవరణలకు శాసనసభ ఆమోదం తెలిపింది.
ప్రస్తుత చట్టంలో ఏముంది
- వ్యవసాయ భూమిని వ్యవసాయేతర భూమిగా మార్చేందుకు ఆర్టీవోలకు విచక్షణాధికారాలు ఉన్నాయి.
- గ్రేటర్‌ హైదరాబాద్‌ మున్సిపల్‌ కార్పొరేషన్‌ పరిధిలో భూమార్పిడికి రెండు శాతం, ఇతర ప్రాంతాల్లో మూడు శాతం పన్ను చెల్లించాలి.
- అధికారికంగా అనుమతి పొందకుండా వ్యవసాయ భూమిని వ్యవసాయేతర అవసరాలకు వినియోగిస్తున్న పక్షంలో 50 శాతాన్ని అపరాధ రుసుముగా వసూలు చేసి భూమార్పిడి నిర్వహిస్తారు. ఈ దరఖాస్తుల పర్యవేక్షణకు ప్రత్యేక వ్యవస్థ లేదు.
తాజా సవరణతో రానున్న మార్పులు
- ఆర్డీవో తదితర అధికారులకు ఉన్న విచక్షణ అధికారాలు పూర్తిగా రద్దవుతాయి.
- దరఖాస్తుదారుడు నేరుగా ఆన్‌లైన్‌ ద్వారా ధరణిలో నమోదు చేసుకోవచ్చు. పెండింగులో ఉన్న దరఖాస్తులను బట్టి స్లాట్‌ ఖరారవుతుంది.
- నిర్ధారిత తేదీ, సమయానికి దరఖాస్తుదారు అన్ని పత్రాలతో హాజరైతే అధికారులు వ్యవసాయేతర భూమికి సంబంధించిన హక్కు పత్రాన్ని(ఈ-పాస్‌బుక్‌) ఇస్తారు. అనంతరం పాసు పుస్తకాన్ని అందజేస్తారు.
- 15 రోజుల వ్యవధిలో ప్రక్రియను పూర్తి చేయాలన్నది లక్ష్యం.
- ఎలాంటి వివాదాలు లేని కోటి ఎకరాలకు పైగా భూవివరాలను ధరణి వెబ్‌సైట్‌లో నమోదు చేశారు. ఆయా భూములకు సంబంధించిన మార్పిడి వ్యవహారాలను తొలిదశలో నిర్వహిస్తారు.