Telangana Letter To KRMB: కృష్ణా జలాల్లో ఉమ్మడి ఆంధ్రప్రదేశ్‌కు కేటాయించిన 811 టీఎంసీల నీటిని తాత్కాలిక ప్రాతిపదికన తెలుగు రాష్ట్రాలు చెరిసగం వినియోగించుకునేలా చూడాలని... కేఆర్ఎంబీని రాష్ట్ర ప్రభుత్వం మరోసారి కోరింది. శ్రీశైలం, నాగార్జునసాగర్ జలాశయాలకు సంబంధించి కృష్ణా బోర్డు రూపొందించిన రూల్ కర్వ్స్‌పై సర్కారు అభ్యంతరం వ్యక్తం చేసింది. అందులో సవరణలు చేయాలని కోరుతూ ఈఎన్సీ మురళీధర్.. కృష్ణా బోర్డు ఛైర్మన్‌కు లేఖ రాశారు.
ట్రైబ్యునల్ తీర్పునకు అనుగుణంగా శ్రీశైలంలో సాగునీటి కోసం కనీస వినియోగమట్టాన్ని 830 అడుగులుగానే కొనసాగించాలని మురళీధర్ కోరారు. పోలవరం నుంచి కృష్ణా డెల్టాకు 80 టీఎంసీలు తరలిస్తున్నందున... తెలంగాణకు రావాల్సిన 45 టీఎంసీలను క్యారీ ఓవర్ చేయడం అంగీకారం కాదన్నారు. గోదావరి జలాలను తరలిస్తున్నందున.. సాగర్ నుంచి కృష్ణా డెల్టాకు 72 టీఎంసీలను తరలించాల్సిన అవసరం లేదని తెలిపారు.