Swachh Survekshan 2022 awards: దేశవ్యాప్తంగా కేంద్ర పట్టణాభివృద్ధి, గృహ నిర్మాణ శాఖలు నిర్వహించిన స్వచ్ఛ సర్వేక్షణ్ 2022 అవార్డుల్లో రాష్ట్రానికి 16 పట్టణ, స్థానిక సంస్థలకు అవార్డులు రావడం పట్ల ముఖ్యమంత్రి కేసీఆర్, పురపాలక శాఖ మంత్రి కేటీఆర్ హర్షం వ్యక్తం చేశారు. స్వయం పాలనలో తెలంగాణ రాష్ట్ర ప్రభుత్వం తీసుకొచ్చిన సంస్కరణలతో పట్టణ ప్రగతి గుణాత్మక దిశగా సాగుతూ దేశానికే ఆదర్శంగా నిలిచిందని ముఖ్యమంత్రి కె.చంద్రశేఖర్ రావు అన్నారు.
2021 జూలై నుంచి 2022 జనవరి కాలానికి జాతీయ స్థాయిలో పారిశుద్ధ్య కార్యక్రమాల నిర్వహణ, గార్జేజ్ ఫ్రీ సిటీ తదితర ప్రామాణికాల్లో రేటింగ్ ఇచ్చి అవార్డులను ప్రకటించారు. ఘన - ద్రవ వ్యర్థాల నిర్వహణ, లిట్టర్ ఫ్రీ వాణిజ్య ప్రాంతాలు, కమ్యూనిటీ స్థాయి కంపోస్టింగ్, పబ్లిక్ - కమ్యూనిటీ టాయిలెట్లు, ప్రజల భాగస్వామ్యం, వినూత్న పరిష్కారాలు తదితర 90 అంశాలను అవార్డులకు ప్రాతిపదికగా తీసుకొన్నారు.
అయితే స్వచ్ఛ సర్వేక్షణ్ 2022లో భాగంగా రాష్ట్రంలోని 16 మున్సిపాల్టీలు, కార్పోరేషన్లకు అవార్డులు దక్కినట్లు కేంద్ర పట్టణాభివృద్ధి శాఖ ప్రకటించింది. వీటితో పాటు రాష్ట్రంలోని 142 పట్టణ, స్థానికసంస్థలకు గాను 70 పట్టణాలకు ఓడీఎఫ్ ప్లస్ హోదా, 40 పట్టణాలకు ఓడీఎఫ్ ప్లస్ ప్లస్ హోదా దక్కాయి. ఒక పట్టణస్థానికసంస్థకు వాటర్ ప్లస్, మిగిలిన 31 ప‌ట్టణాలను ఓడీఎఫ్ గా కేంద్ర పట్టణాభివృద్ధిశాఖ ప్రకటించింది.