'జగన్​బాబు మమ్మల్ని ఇంటికి చేర్చండి'

పొట్టకూటి కోసం కువైట్ వెళ్లి లాక్ డౌన్ కారణంగా అక్కడ చిక్కుకున్న శ్రీకాకుళం వాసులు.. తమను స్వదేశానికి రప్పించాల్సిందిగా ఏపీ ముఖ్యమంత్రి జగన్​ను వేడుకున్నారు. కరోనాతో తాము పనిచేసే కార్యాలయాలు మూసేయటంతో తీవ్ర ఇబ్బందులు ఎదుర్కొంటున్నామని వాపోయారు.

ఏపీలోని శ్రీకాకుళం జిల్లాకు చెందిన దాదాపు 400 మంది కువైట్​లో చిక్కుకున్నారు. వీరంతా వివిధ పనుల కోసం అరబ్ దేశానికి వెళ్లినవారు. లాక్ డౌన్ కారణంగా ఆయా కంపెనీలు మూసేయటంతో వీరు అక్కడే చిక్కుకుపోయారు. దీంతో సంతబొమ్మాళి, కంచిలి, హిరమండలం, వజ్రపుకొత్తూరు, సోంపేట ప్రాంతాలకు చెందిన వారు అక్కడ తీవ్ర ఇబ్బందులు ఎదుర్కొంటున్నారు. ఒక చిన్న గదిలో 100 మంది వరకు ఉంటున్నామని వాపోయారు.

స్వదేశానికి పంపించమని అక్కడి అధికారులను అడిగితే స్పందన లేదని.. పైగా మళ్లీ అడిగితే జైల్లో పెడతామంటూ హెచ్చరిస్తున్నారని ఆవేదన వ్యక్తంచేశారు. రాష్ట్ర ప్రభుత్వం స్పందించి తమను స్వదేశానికి రప్పించాల్సిందిగా వేడుకుంటున్నారు.