కొన్ని వందల ఏళ్ల కింద మొదలైన అనాగరిక పరీక్షలు కొంతమంది అమాయక స్త్రీల పాలిట శాపంగా మారుతున్నాయని చెప్పచ్చు. వారి హక్కులకు, వ్యక్తిగత జీవితానికి, గోప్యతకు భంగం కలిగిస్తున్నాయి. ఇటీవల రాజస్థాన్‌లో కామంతో కళ్లు మూసుకుపోయిన ఓ మృగం తనపై అత్యాచారం చేశాడన్నా పట్టించుకోకుండా ఆమెను పెళ్లి చేసుకున్నాడో అబ్బాయి. అలాగని అది ఆదర్శ వివాహం అనుకుంటే పొరబడినట్లే! అసలు విషయం తెలిసినా పెళ్లైన తొలిరాత్రే వధువుకు కన్యత్వ పరీక్ష నిర్వహించారు ఆమె అత్తింటి వారు. అందులో విఫలమైన ఆమెను చిత్రహింసలు పెట్టడమే కాదు.. పంచాయతీకి లాగి పదిమందిలోనూ నిలబెట్టారు. అలా ఆమె పరువు తీయడమే కాదు.. నష్ట పరిహారం చెల్లించమని గ్రామ పెద్దలు తీర్పు ఇవ్వడం శోచనీయం.
ఈ క్రమంలో మన దేశంలోని కొన్ని మారుమూల గ్రామాలు, తెగల్లో ఇప్పటికీ కన్యత్వ పరీక్షల పేరుతో వధువు పరువు మంటగలుస్తోందంటున్నాయి పలు అధ్యయనాలు. అసలు ఇంతకీ ఏంటీ కన్యత్వ పరీక్షలు? అన్ని రంగాల్లోనూ స్త్రీలు దూసుకుపోతోన్న ఈ కాలంలోనూ ఆడవారిపై ఈ అనాగరిక చర్యలేంటి? ఇవి మహిళలపై ఎలాంటి ప్రభావం చూపుతాయి? రండి.. తెలుసుకుందాం..!
అత్యాచారం జరిగిందని చెప్పినా..పెళ్లయ్యాక అమ్మాయికి అత్తారిల్లే పుట్టిల్లు. అత్తమామలే తల్లిదండ్రులు. ఈ నమ్మకంతోనే మెట్టినింట్లో అడుగుపెట్టింది రాజస్థాన్‌ భిల్వారా జిల్లా సన్సీ అనే తెగకు చెందిన ఓ అమ్మాయి. అయితే పెళ్లికి ముందే తనపై ఓ కామాంధుడు అత్యాచారం చేశాడని తనకు కాబోయే అత్తగారితో చెప్పినా.. ఆదర్శ కుటుంబంలా ఆమెను కోడలిని చేసుకోవడానికి ముందుకొచ్చారు. ఇలా వాళ్ల మంచితనం చూసి మురిసిపోయిన వధువుకు తొలిరాత్రి నుంచి వేధింపులు మొదలయ్యాయి. నిజానికి ఆ తెగలో కన్యత్వ పరీక్షలు చాలా సహజం. శోభనం రాత్రి ఆ పరీక్షలో విఫలమైన ఆ వధువును భర్త, అత్తింటి వారు కొట్టడం, నిత్యం హింసించడంతో.. ఇక తట్టుకోలేక పోలీసులను ఆశ్రయించిందామె. దీంతో ఆ గ్రామ పెద్దలు ఆ అమ్మాయిని పంచాయతీకి పిలిచి.. తనదే తప్పని తీర్పిచ్చారు. తనకు జరిగిన అన్యాయాన్ని ముందే తన అత్తింటి వారికి చెప్పానని ఆమె వాపోయినా.. వినిపించుకోకుండా వధువు కుటుంబాన్ని వరుడి కుటుంబానికి రూ. 10 లక్షల జరిమానా చెల్లించమనడం గమనార్హం. ఇక్కడ వరుడి తండ్రి హెడ్ కానిస్టేబుల్‌ కావడం, తన కోడలిపై జరిగిన అఘాయిత్యం గురించి ముందే తెలిసినా నోరు మెదపకపోవడం కొసమెరుపు. ఈ ఒక్క సంఘటన చాలు.. సన్సీ తెగలో నవ వధువులు, కోడళ్ల పరిస్థితి ఎంత దయనీయంగా ఉంటుందో చెప్పడానికి!
అసలేంటీ కన్యత్వ పరీక్ష..కన్యత్వ పరీక్ష.. మహిళ పెళ్లికి ముందే ఇతరులతో శారీరక సంబంధం కలిగి ఉందో, లేదో తెలుసుకోవడానికి పెట్టే పరీక్ష ఇది! రాజస్థాన్‌లోని సన్సీ తెగలో ఇప్పటికీ ఈ ఆచారం కొనసాగుతోంది. ‘కుకడీ ప్రాథా వేడుక’గా పిలిచే ఈ పరీక్షలో భాగంగా.. తొలిరాత్రి వధువుకు తన భర్తతో కలిసినప్పుడు కన్నె పొర చిరిగిపోయి బ్లీడింగ్‌ జరగాలి. దాన్ని గుర్తించడానికి వారి మంచంపై తెల్లటి బెడ్‌షీట్‌ని పరుస్తారు. దానిపై రక్తపు మరకలు పడితే ఆమె కన్య అని, లేదంటే పతితగా ఆమెపై ముద్ర వేస్తారు. అంతేకాదు.. ఆ మహిళ కన్య కాదని తెలిస్తే అత్తింటి వారి నుంచి తీవ్ర వేధింపులు ఎదుర్కోవాల్సి ఉంటుంది. అలాగే వధువు కుటుంబం వరుడి కుటుంబానికి కొంత నగదు పరిహారం కూడా చెల్లించాల్సి రావచ్చు.
అక్కడి వధువులకు ‘అగ్నిపరీక్ష’!..అయితే ఇలా సన్సీ తెగలోనే కాదు.. రాజస్థాన్‌ నుంచి మహారాష్ట్రకు వలస వచ్చిన కంజర్‌భాత్‌ తెగలోనూ వధువు కన్యత్వాన్ని పరీక్షించడానికి అచ్చం ఇలాంటి ఆచారాన్నే పాటిస్తున్నారు. ఈ రెండు చోట్లనే కాదు.. దేశంలోని కొన్ని మారుమూల గ్రామాలు/తెగల్లో వివిధ పేర్లతో ఇలాంటి పరీక్షలు నేటికీ జరుగుతున్నాయని కొన్ని అధ్యయనాలు చెబుతున్నాయి.
పానీ కీ ధీజ్ :దేశంలో వివిధ రాష్ట్రాల్లోని కొన్ని తెగల్లో ‘పానీ కీ ధీజ్’ పేరుతో కన్యత్వ పరీక్షలు నిర్వహిస్తున్నారు. ఇందులో భాగంగా.. ఒక వ్యక్తి వంద అడుగులు వేయాలి. అలా అడుగులు వేయడం పూర్తయ్యేవరకు వధువు నీటిలో మునిగి అంతసేపూ ఊపిరి బిగబట్టి ఉండాలి. ఇలా ఉంటే సరే సరి.. లేదంటే మాత్రం అత్తింటి వారి నుంచి తీవ్ర వేధింపులు ఎదుర్కోక తప్పదు.