Malaikaja Sweet: మలైకాజా... ఏపీలోని నెల్లూరు వాసులకు 7 దశాబ్దాలుగా అత్యంత ఇష్టమైన మిఠాయిగా ప్రసిద్ధికెక్కింది. స్వీట్స్ అంటే ఇష్టంలేని వారు సైతం లొట్టలేసుకుంటూ తినే రుచి మలైకాజా సొంతం అంటే నమ్మాల్సిందే! తెలుగు రాష్ట్రాలతోపాటు విదేశాలకూ ఎగుమతి అవుతున్న ఈ మలైకాజాకు చిరునామాగా నిలుస్తోంది నెల్లూరులోని జైహింద్ స్వీట్స్. ఎప్పుడో స్వాతంత్య్ర పోరాట సమయంలో పురుడుపోసుకున్న ఈ మిఠాయికి.. రోజురోజుకూ ఆదరణ పెరుగుతోంది.
ఉత్తర్‌ప్రదేశ్‌లోని బుందేల్‌ఖండ్‌ ప్రాంతానికి చెందిన కమాల్‌ సింగ్‌ కుటుంబం.. 1945లో ఉపాధి వెతుక్కుంటూ నెల్లూరు వచ్చి స్థిరపడింది. స్వాతంత్రోద్యమ కాంక్ష తీవ్రంగా ఉన్న ఆ సమయంలో.. మిఠాయి వ్యాపారం ప్రారంభించిన కమాల్‌సింగ్‌... తన దుకాణానికి జైహింద్ అని పేరు పెట్టుకున్నారు. దమ్‌ రోటీహల్వా, బొంబాయి హల్వా, బాదుషా వంటి మిఠాయిలు విక్రయించేవారు. అయితే.. వాటన్నింటి కంటే మలైకాజా బాగా ప్రాచుర్యం పొందింది.