'సోనూ' మరో సాయం.. స్వస్థలాలకు చేరిన రష్యాలోని భారత విద్యార్థులు

సోనూసూద్.. కరోనా కష్టకాలంలో సాయానికి మారుపేరుగా నిలుస్తున్న పేరు. ఇప్పటికే ఎంతోమంది వలస కూలీలను స్వగ్రామాలకు చేర్చిన ఈ సినీనటుడు.. మరెంతో మందిని ఎన్నో విధాలుగా ఆదుకుంటున్నారు. రాష్ట్రాలు, ప్రాంతాలతో సంబంధం లేకుండా ఆపదలో ఉన్నవారికి ఆపద్బాంధవుడిగా మారుతున్న సోనూ.. తాజాగా రష్యాలో చిక్కుకున్న దేశ విద్యార్థులు స్వస్థలాలకు రావడంలో సాయపడ్డారు.

రష్యాలో వైద్య విద్య అభ్యసిస్తున్న కొంతమంది విద్యార్థులు కరోనా కారణంగా అక్కడే చిక్కుకుపోయారు. వారిలో ఆంధ్రప్రదేశ్ శ్రీకాకుళం జిల్లాకు చెందిన ఏడుగురు విద్యార్థులు ఉన్నారు. వారు స్వదేశానికి వచ్చేందుకు సహాయం కోసం ట్విట్టర్ ద్వారా సోనూసూద్​ను అర్థించారు. స్పందించిన ఆయన... వారంతా భారత్​కు వచ్చేందుకు ఏర్పాట్లు చేశారు.

ఈనెల 24న వారంతా ప్రత్యేక విమానం ద్వారా స్వదేశానికి చేరుకున్నారు. తమ పిల్లలు ఇళ్లకు వచ్చేందుకు సహాయం చేసిన సోనూకు విద్యార్థుల తల్లిదండ్రులు మనస్ఫూర్తిగా కృతజ్ఞతలు తెలిపారు.

ఇవీ చూడండి:గేటెడ్‌ కమ్యూనిటీల్లో కరోనా చికిత్స