Smoke on Spice Jet plane: స్పైస్ జెట్ విమానానికి తృటిలో ప్రమాదం తప్పింది. విమానం ఆకాశంలో ఉండగానే లోపల పొగలు కమ్ముకున్నాయి. దీంతో ప్రయాణికులు తీవ్ర ఇబ్బందులు పడ్డారు. ప్రయాణికులకు ఎటువంటి ప్రమాదం జరగకపోవడంతో అందరూ ఊపిరి పీల్చుకున్నారు.
గోవా నుంచి హైదరాబాద్ వస్తున్న స్పైస్ జెట్ ఎస్జీ 3735 విమానంలో పొగలు వ్యాపించాయి. ఆ పొగతోనే దాదాపు 28 నిమిషాలపాటు ఆకాశంలోనే చక్కర్లు కొట్టింది. విమానంలో పొగలు రావడంతో అందులో ప్రయాణిస్తున్న 86 మంది ప్రయాణికులు ఉక్కిరి బిక్కిరికి గురయ్యారు. చివరికి విమానం శంషాబాద్ ఎయిర్పోర్ట్ రన్వే చివరలో పైలట్ అత్యవసర ల్యాండింగ్ చేశారు. దీనితో విమానంలో ఉన్న 86 మంది ప్రయాణికులు ఊపిరి పీల్చుకున్నారు. ఈ ప్రమాదంలో ఓ మహిళా ప్రయాణికురాలు అస్వస్థతకు గురైంది. ఆమెకు ఎయిర్ పోర్ట్ ఆసుపత్రిలో చికిత్స అందిస్తున్నారు. ఇప్పుడు జరిగిన ప్రమాదానికి గల కారణాలను అధికారులు విశ్లేషిస్తున్నారు.