రైతులను కేసీఆర్‌ మోసం చేశారు: జగ్గారెడ్డి

కేంద్ర నిర్ణయాలను ఒకసారి వ్యతిరేకిస్తూ.. మరోసారి మద్దతిస్తూ సీఎం కేసీఆర్‌ ద్వంద్వ వైఖరి అవలంభిస్తున్నారని సంగారెడ్డి ఎమ్మెల్యే జగ్గారెడ్డి విమర్శించారు. కొనుగోలు కేంద్రాలను ఎత్తేస్తామనడం సరికాదన్నారు. గాంధీభవన్​లో ఏర్పాటు చేసిన టీపీసీసీ సమావేశంలో ఎమ్మెల్యే ప్రసంగించారు.

భాజపా, తెరాస రైతులకు తీవ్రంగా నష్టం చేస్తున్నాయని సంగారెడ్డి ఎమ్మెల్యే జగ్గారెడ్డి ఆరోపించారు. సీఎం కేసీఆర్‌ తెలంగాణ రైతులను మోసం చేశారని ధ్వజమెత్తారు. ఒకసారి కేంద్ర నిర్ణయాలను వ్యతిరేకిస్తారని.. మరోసారి మద్దతు ఇస్తారని దుయ్యబట్టారు. ఈ మేరకు తెలంగాణ ప్రదేశ్​ కాంగ్రెస్​ కమిటీ ఆధ్వర్యంలో గాంధీభవన్​లో ఏర్పాటు చేసిన సమావేశంలో ప్రసంగించారు.

దిల్లీలో మూడు రోజులున్న కేసీఆర్..‌ తీవ్ర చలిలో ఉద్యమాలు చేస్తున్న రైతులకు ఎందుకు సంఘీభావం ప్రకటించలేదని ఆగ్రహించారు. దిల్లీ నుంచి రాగానే 13రోజులపాటు ఫాంహౌస్‌లో గడిపిన కేసీఆర్‌.. కొనుగోలు కేంద్రాలను ఎత్తేస్తామనడానికి కారణమేంటని ప్రశ్నించారు. ఈ విషయాన్ని రైతులు ఆలోచించాలని కోరారు.

ఇదీ చూడండి: యాసంగి కోసం రైతుబంధు సాయం పంపిణీ ప్రారంభం