కొద్ది రోజుల క్రితం ఎడతెరపి లేకుండా కురిసిన వర్షాలకు హైదరాబాద్లో కొన్ని పురాతన ఇళ్ళు కూలిపోయే పరిస్థితికి చేరుకున్నాయి. పోలీసుల సాయంతో జీహెచ్ఎంసీ అధికారులు ఇలాంటి కొన్ని ఇళ్ళు గుర్తించే పనిలో పడ్డారు. ఇదే క్రమంలో ఖైరతాబాద్‌ డివిజన్‌లోని తుమ్మలబస్తీలో నాలా పక్కన ఓ ఇంటి గోడ కూలిపోయి ఉండటం గమనించారు. అక్కడకు వెళ్లిన సిబ్బందికి లోపల ఓ వృద్ధురాలు కనిపించింది. లేవలేని స్థితిలో ఆమెను చూసి చలించిపోయారు. వెంటనే ఉన్నతాధికారులకు సమాచారం అందించారు.
సకలసౌకర్యాలతో...
వృద్ధురాలి వివరాలు సేకరించి యాదమ్మగా గుర్తించారు. సైఫాబాద్ పోలీస్టేషన్లో డిటెక్టివ్ ఇన్స్పెక్టర్గా విధులు నిర్వర్తిస్తున్న రాజు నాయక్ యాదమ్మకు ఇల్లు కట్టించి ఇవ్వాలని తలిచారు. ఇల్లు నిర్మించినంత కాలం బుద్వేల్లోని తనకు తెలిసిన థామస్‌ వృద్ధాశ్రమానికి యాదమ్మను తరలించారు. తన సొంత ఖర్చులతో వృద్ధురాలి ఇంటిని తిరిగి నిర్మించారు. ఇందుకు స్టేషన్లోని ఎస్సైలు సైతం తోడవగా... అన్ని సౌకర్యాలు సమకూరాయి. యాదమ్మకు ఇక ఏ లోటూ రాకుండా అన్ని ఏర్పాట్లు కల్పించాలని నిర్ణయించారు. పడుకోవడాని మంచం, పరుపు, గదిలో ఫ్యాను, లైట్లు ఏర్పాటు చేశారు.