గర్భిణీకి పురిటి నొప్పులు... 9 కిలోమీటర్లు డోలిలో మోసిన కుటుంబసభ్యులు...

Pregnant woman in doli: తరాలు మారాయి... ప్రభుత్వాలు మారుతున్నాయి... కానీ అణగారిన ప్రజల బతుకులు మాత్రం మారడంలేదు..! దగ్గొచ్చినా, జ్వరం వచ్చినా... కిలో మీటర్ల మేర నడవాల్సిందే. ఆ నడిచే దారి కూడా సరిగా ఉండదు. ఆఖరికి మహిళలు ప్రసవం కోసమూ.. పురిటి నొప్పులను భరిస్తూ కిలో మీటర్ల కొద్దీ కాలినడకన వెళ్లాల్సిందే. తాజాగా ఓ గర్భిణీకి ఇదే పరిస్థితి ఎదురైంది. పురిటినొప్పులతో ఉన్న మహిళను డోలిలో మోసుకుంటా 9 కి.మీ మేర నడిచి... ఆస్పత్రికి చేర్చారు.!

Pregnant woman in doli: ఏపీలోని అనకాపల్లి జిల్లా రోలుగుంట మండలంలో ఓ గర్భిణీకి డోలి మోత తప్పలేదు. సుమారు 9 కిలో మీటర్ల దూరం వరకు డోలిలోనే మోసుకెళ్లాల్సి వచ్చింది. కొయ్యూరు మండలం ములపేట పంచాయితీ పరిధిలోని జాజులబంద గ్రామానికి చెందిన పాంగి శాంతికి నెలలు నిండటంతో గ్రామం నుంచి డోలి మోతతో... దాదాపు 9 కిలో మీటర్లు నడిచి రోలుగుంట ప్రాథమిక ఆరోగ్య కేంద్రానికి తరలించారు.

అక్కడ నుంచి నర్సీపట్నం ప్రాంతీయ ఆస్పత్రికి తీసుకెళ్లారు. అనంతరం.. వైద్యుల సూచన మేరకు విశాఖ నగరలోని కేజీహెచ్​లో చేర్చారు. అక్కడ ఇవాళ తెల్లారుజామునే పండంటి పాపకు జన్మనిచ్చింది. స్వాతంత్య్రం వచ్చి ఇన్ని ఏళ్లు గడుస్తున్నా తమ తలరాతలు మారలేదని స్థానికులు ఆవేదన వ్యక్తం చేస్తున్నారు.

ఇవీ చదవండి:కాళ్లు పోయాయి... కష్టాలు మిగిలాయి... ఆపన్న హస్తం కోసం ఎదురుచూపు..