కరోనాకు గర్భిణి బలి.. మనసును కలచివేస్తోన్న సెల్ఫీవీడియో!

కొవిడ్ ధాటికి బలై ప్రాణాలు కోల్పోతున్న ఘటనలు కంటతడి పెట్టిస్తునే ఉన్నాయి. పడకలు, ఆక్సిజన్ కొరతతో మరణిస్తున్న దయనీయ గాథలు ఒక్కొక్కటిగా వెలుగు చూస్తునే ఉన్నాయి. అలాంటి ఘటనే ఏపీలోని కాకినాడలో జరిగింది. కరోనా కారణంగా గర్భిణి మృతి చెందినట్లు ఆమె కుటుంబ సభ్యులు తెలిపారు. సమస్యను తెలియజేసేలా.. ఆ గర్భిణి మరణానికి 2 రోజుల క్రితం తీసుకున్న సెల్ఫీ వీడియో.. మనసును కలచివేస్తోంది.

ఏపీలోని తూర్పు గోదావరి జిల్లా కాకినాడ జీజీహెచ్​లో జరిగిన హృదయ విదారక ఘటన వెలుగుచూసింది. కాకినాడ గ్రామీణ మండలం రమణయ్యపేట సచివాలయంలో వాలంటీర్​గా పనిచేస్తున్న 32 ఏళ్ల లక్ష్మి.. 7 నెలల గర్భిణి. కరోనా సోకి 9 రోజులపాటు మహమ్మారితో పోరాడింది. చివరికి మృత్యువు ముందు ఓటమి చెందింది.

లక్ష్మి మృతి చెందినట్లు ఆమె కుటుంబ సభ్యులు తెలిపారు. జీజీహెచ్​లో సరిగా చికిత్స అందడం లేదని రెండు రోజుల క్రితం ఆమె సెల్ఫీ వీడియో తీశారు. ఆక్సిజన్ అందక ఊపిరి తీసుకోవడం కష్టంగా ఉందని తెలిపారు. చివరి క్షణాల్లో ఆమె ఊపిరి ఎంతో కష్టంగా తీసుకున్న దృశ్యాలు.. మనసుని కలిచేవేస్తున్నాయి.

ఇదీ చదవండి:ఏ తల్లైనా.. బిడ్డ నుంచి ఆశించేది కాస్తంత ప్రేమే!