Dengue Fever Precautions : వాతావరణంలో మార్పులు, వర్షాలతో దోమలు పెరుగుతాయి. వాటితో పాటు చికెన్‌గున్యా, మలేరియా, డెంగీ, వైరల్ జ్వరాలు ప్రబలుతాయి. ఈ జబ్బులు పిల్లలకు తొందరగా వ్యాపిస్తాయి. ఇలాంటి సమయంలో వైద్యుల దగ్గరికి వెళ్తే జ్వరాలను అదుపులోకి తెచ్చే అవకాశాలుంటాయి. పిల్లలకు వచ్చే జ్వరాలతో ఆందోళన చెందకుండా పరిసరాలను పరిశుభ్రంగా ఉంచేందుకు సిద్ధం కావాలని వైద్యులు సూచిస్తున్నారు. మంచినీటిలో పెరిగే దోమలతోనే డెంగీ జ్వరాలు రానున్నాయి. ఈ విషయాన్ని దృష్టిలో ఉంచుకొని జాగ్రత్తలు తీసుకుంటే ఇబ్బందులుండవని ప్రముఖ చిన్న పిల్లల వైద్య నిపుణులు డాక్టర్‌ పి.వి.రామారావు తెలిపారు.
లక్షణాలు ఎలా ఉంటాయి..ఇది జ్వరంతో మొదలవుతుంది. నాలుగైదు రోజులుంటుంది. ఒళ్లునొప్పులుంటాయి. తల, కండరాలు, కీళ్ల నొప్పులు ఎక్కువ అవుతాయి. కొంతమందికి వాంతులు, కడుపునొప్పి కూడా ఉంటుంది. కొందరికి చర్మంపై ఎర్రదద్దుర్లు వస్తాయి. ఈ లక్షణాలు డెంగీ, వైరల్ జ్వరాల్లోనూ ఉంటాయి. సాధారణ జ్వరానికి, డెంగీ జ్వరానికి మధ్య స్వల్ప తేడాలుంటాయి. డెంగీ జ్వరం వస్తే ఎర్రదద్దుర్లు చర్మంపై వస్తాయి. ప్లేట్‌లెట్ల సంఖ్య తగ్గిపోతుంది. చలితో జ్వరం వస్తే మలేరియాగా అనుమానించాలి. నీరు, ఆహారం కలుషితం అయితే టైఫాయిడ్‌ వస్తుంది. వాంతులు, విరేచనాలతో జ్వరం ఎక్కువ రోజులుంటుంది.