రాష్ట్రంలోని ఆరు సంప్రదాయ విశ్వవిద్యాలయాల్లో పీహెచ్‌డీల ప్రవేశాలకు ఉమ్మడి ప్రవేశ పరీక్ష(సెట్‌) నిర్వహించాలని ఆయా వర్సిటీల ఉపకులపతులు నిర్ణయించారు. రాష్ట్ర ఉన్నత విద్యామండలి ఛైర్మన్‌ తుమ్మల పాపిరెడ్డి, కళాశాల విద్యాశాఖ కమిషనర్‌ నవీన్‌ మిత్తల్‌ సమక్షంలో గురువారం జరిగిన సమావేశంలో ఈ నిర్ణయం తీసుకున్నారు. దోస్త్‌ ప్రవేశాలు, ఇతరత్రా అంశాలపై చర్చించేందుకు ఉన్నత విద్యామండలి సమావేశం ఏర్పాటుచేయగా ఓయూ, కాకతీయ, తెలంగాణ, పాలమూరు, మహాత్మాగాంధీ, అంబేడ్కర్‌ సార్వత్రిక విశ్వవిద్యాలయాల ఉపకులపతులు హాజరయ్యారు. ఈ సందర్భంగా పీహెచ్‌డీలకు ఉమ్మడి ప్రవేశ పరీక్ష జరపాలని నిర్ణయించారు. దీనిపై విధివిధానాల రూపకల్పనకు ఉన్నత విద్యామండలి ఛైర్మన్‌ ఓ కమిటీని నియమించనున్నారు. సమావేశంలో దోస్త్‌ కన్వీనర్‌ ఆర్‌.లింబాద్రి, ఉన్నత విద్యామండలి ఉపాధ్యక్షుడు వి.వెంకటరమణ, కార్యదర్శి శ్రీనివాసరావు, ఉపకులపతులు రవీందర్‌, గోపాల్‌రెడ్డి, సీతారామారావు, తాడికొండ రమేష్‌, రాథోడ్‌, రవీందర్‌ గుప్తా పాల్గొన్నారు.
ముఖ్య నిర్ణయాలు
- పీజీ ప్రవేశాల కోసం 2021-22 విద్యా సంవత్సరానికి సైతం ఓయూనే ఉమ్మడి పీజీ ప్రవేశ పరీక్ష (సీపీగెట్‌) నిర్వహిస్తుంది.
- అండర్‌ గ్రాడ్యుయేట్‌(యూజీ)కి ఉమ్మడి విద్యా కాలపట్టిక(కామన్‌ అల్మానాక్‌)కు ఆమోదం తెలిపింది.
- నాలుగు విశ్వవిద్యాలయ, ప్రభుత్వ కళాశాలల్లో బీఏ ఆనర్స్‌ కోర్సును ప్రయోగాత్మకంగా ప్రవేశపెడతారు. దీనికి పాఠ్య ప్రణాళికను ఓయూ రూపొందించి, పర్యవేక్షిస్తుంది.
- క్లస్టర్‌ విధానాన్ని అమలుచేస్తారు. దీని ప్రకారం ప్రభుత్వ కళాశాలల్లోని మానవ వనరులు, ప్రయోగశాలలు తదితరాలను సమీప కళాశాలలు కూడా వినియోగించుకుంటాయి. ప్రభుత్వ డిగ్రీ, పీజీ కళాశాలలకే ఇది వర్తిస్తుంది. ఒకచోట ఒక సబ్జెక్టులో ఎక్కువ మంది ఆచార్యులు/అధ్యాపకులు ఉంటే కొరత ఉన్న కళాశాలలకు వెళ్లి బోధిస్తారు. అలాగే ఏదైనా ఒక సబ్జెక్టుపై ఆసక్తి ఉండి చదివే కళాశాలలో అది లేకుంటే విద్యార్థులు ఉన్నచోటకు వెళ్లి చదువుకుంటారు. దీనిపై కమిటీని నియమించి విధివిధానాలు రూపొందిస్తారు.
- అంబేడ్కర్‌ సార్వత్రిక విశ్వవిద్యాలయం రూపొందించిన ఇ-వనరులు(ఆన్‌లైన్‌ పాఠాలు),కోర్సు మెటీరియల్‌ తదితరాలను అన్ని వర్సిటీలూ వినియోగించుకోవచ్చు.
- వరుసగా రెండేళ్లు ఒక్కరూ చేరని కళాశాలల జాబితాను దోస్త్‌ వెబ్‌సైట్లో ఉంచుతారు. అందులో చేరేందుకు ఆప్షన్‌ ఇచ్చుకోవాలా? లేదా? అన్నది విద్యార్థులు నిర్ణయించుకునేందుకు వీలవుతుంది.