కరోనాతో వ్యక్తి మృతి.. రాత్రంతా ఇంటి ముందే ఉన్న మృతదేహం

కరోనా.. ఈ పేరు వింటేనే జనం భయపడిపోతున్నారు. ఎప్పుడు ఎవరికి సోకుతుందో.. ఎలా బలితీసుకుంటుందో తెలియక బిక్కుబిక్కుమంటూ బతుకీడుస్తున్నారు. మరీ ముఖ్యంగా బంధాలను దూరంచేస్తోంది. మానవత్వం అనే మాటను మరిచిపోయేలా చేస్తోందీ ఈ మహమ్మారి. వైరస్​తో చనిపోతే అయినవాళ్లే మొహం చాటేసేలా చేస్తోంది. ఓ వ్యక్తి కొవిడ్​తో చనిపోతే ఒక రాత్రంతా అనాథ శవంలా గుమ్మం ముందే ఉన్న ఘటన ఏపీలోని తూర్పుగోదావరి జిల్లా వానపల్లిలో జరిగింది.

తూర్పుగోదావరి జిల్లా కొత్తపేట మండలం వానపల్లికి చెందిన 40 ఏళ్ల వ్యక్తికి కరోనా సోకింది. అప్పటినుంచి హోం ఐసోలేషన్​లో ఉంటున్నాడు. శుక్రవారం రాత్రి ఊపిరి అందక బాధపడటంతో స్థానికులు 108కు ఫోన్ చేశారు. వారు వచ్చేసరికే అతను మృతిచెందాడు. అతని భార్యకూ వైరస్ సోకడం వల్ల ఆమె బోడనకుర్రు క్వారంటైన్​లో ఉంటోంది. ఆ వ్యక్తికి అంత్యక్రియలు చేసేందుకూ ఎవరూ ముందుకు రాకపోవటం వల్ల అతని మృతదేహం ఇంటి ముందే ఉంది.

ఇదీ చూడండి:సిలిండర్​ సమక్షంలో డీజిల్​ను పెళ్లాడిన పెట్రోల్​