Mogilaiah Kinnera Damage : పవన్కల్యాణ్ భీమ్లానాయక్ చిత్రం ప్రీరిలీజ్ ఈవెంట్ సందర్భంగా... పద్మశ్రీ కిన్నెర మొగిలయ్యకు చేదు అనుభవం ఎదురైంది. పవన్ అభిమానుల తాకిడికి మొగలయ్య చేతిలోని కిన్నెర స్వల్పంగా దెబ్బతింది. బుధవారం భీమ్లానాయక్ ప్రీరిలీజ్ ఈవెంట్లో పాటపాడి తిరిగి వెళ్తుండగా... మొగలియ్యతో సెల్ఫీలు దిగేందుకు అభిమానులు పోటీపడ్డారు. ఈ క్రమంలో జరిగిన తోపులాటలో మొగిలయ్య చేతిలో ఉన్న కిన్నెరలోని భాగాలు ఊడిపోయాయి.
పెద్ద సంఖ్యలో అభిమానులు తనను చుట్టుముట్టడం వల్ల ఏంచేయాలో పాలుపోలేదని, వాళ్లతో మాట్లాడలేక, బయటికి వెళ్లలేక సతమతమయ్యాయని మొగిలయ్య ఆవేదన వ్యక్తం చేశారు. పోలీసుల సహకారంతో సజావుగా బయటపడ్డానని తెలిపారు. దెబ్బతిన్న కిన్నెరను బాగుచేసుకుంటున్నట్లు వివరించారు.