పాతబస్తీ పరిధిలోని పలు కాలనీలు ప్రజలు ఇంకా వరద ముంపు నుంచి తేరుకోలేదు. విరుచుకుపడ్డ జల విపత్తుతో ఇంట్లో నిత్యావసరాలు సహా విలువైన సామాన్లు కొట్టుకుపోయాయని ఆవేదన చెందుతున్నారు. ఆస్తినష్టంతో కోలుకోలేని దెబ్బపడిందని వాపోయారు. స్థానికులు వరదల్లో పోయిన సామాగ్రిని వెతుక్కునే పనిలో ఉన్నారు. ప్రభుత్వమే ఆదుకోవాలని బాధిత జనం కోరుతున్నారు.
కంటిమీద కునుకు లేకుండా..
సమీప కాలనీల ప్రజలకు కంటిమీద కునుకు లేకుండా చేస్తున్న జీడిమెట్ల ఫాక్స్ చెరువు ప్రవాహ ఉద్ధృతి కొనసాగుతూనే ఉంది. 56 బస్తీల జనం ముంపు బారిన పడ్డారని పురపాలక పరిపాలన కమిషనర్‌ సత్యనారాయణ వెల్లడించారు. బాధిత కాలనీల్లో పర్యటించిన ఆయన.. చెరువు ఎఫ్టీఎల్ పరిధిలో ఉన్న బస్తీల ప్రజలు ఇళ్లు ఖాళీ చేసి సురక్షిత ప్రాంతాలకు తరలివెళ్లాలని సూచించారు. వరద తగ్గిన ప్రాంతాల్లో అంటువ్యాధులు ప్రబలకుండా రసాయనాలు పిచికారీ చేయాలని ఆయా మున్సిపల్‌ కమిషనర్లను ఆదేశించినట్లు సత్యనారాయణ వెల్లడించారు.