ఆంధ్రప్రదేశ్లోని 11 పురపాలక, నగర పంచాయతీల్లో, ఇటీవల జరిగిన ఎన్నికల్లో గెలుపొంది వివిధ కారణాలతో సభ్యులు మృతి చెందిన 8 పురపాలక, నగర పంచాయతీల్లోని పలు వార్డు స్థానాలకు ఎన్నికల నిర్వహణకు రాష్ట్ర ఎన్నికల సంఘం ఏర్పాట్లు చేస్తోంది. ఇందులో భాగంగా సవరించిన ఓటర్ల జాబితాలను సిద్ధం చేయాలని పురపాలకశాఖను ఎన్నికల సంఘం కమిషనరు సోమవారం ఆదేశించారు.
ఇటీవల రాష్ట్రంలోని 75 పురపాలక, నగర పంచాయతీలు, 12 నగరపాలక సంస్థలకు ఎన్నికలు నిర్వహించారు. కోర్టు వివాదాలు, ఇతర కారణాలతో నిర్వహించలేని చోట్ల ఇప్పుడు పూర్తి చేయాలని ఎన్నికల సంఘం నిర్ణయించింది. ఈ మేరకు కమిషనరు నీలం సాహ్ని ఇటీవల పురపాలకశాఖ అధికారులతో సమావేశమై పలు సూచనలు చేశారు. త్వరలో ఎన్నికలు జరిగే అవకాశం ఉంది.