RRR ticket price in AP : పేదోడికి వినోదాన్ని అందుబాటులో ఉంచాలనే సినిమా టికెట్‌ ధరల్ని తగ్గించామని చెప్పిన వైకాపా ప్రభుత్వం.. ఇప్పుడు అదే పేదోడిపైనే అత్యధికంగా భారం మోపింది. రాష్ట్రంలోని థియేటర్లలో ప్రస్తుతం రూ.20గా ఉన్న కనీస టికెట్‌ ధరను.. ఆర్‌ఆర్‌ఆర్‌ సినిమా కోసం రూ.95కు పెంచింది. ప్రస్తుత ధర కన్నా ఇది 4.75 రెట్లు ఎక్కువ. ఈ నెల 7వ తేదీ కంటే ముందు అమల్లో ఉన్న ధరల ప్రకారం రాష్ట్రంలోని థియేటర్లలో సినిమా టికెట్‌ కనీస ధర రూ.5. దాంతో పోలిస్తే ఏకంగా 19 రెట్లు పెంచినట్లయ్యింది. ఈ నెల 25న విడుదల కానున్న ఆర్‌ఆర్‌ఆర్‌ను సూపర్‌ హై బడ్జెట్‌ సినిమాగా పరిగణిస్తూ పంచాయతీ, పురపాలక, నగరపాలక సంస్థల్లో ఏసీ, నాన్‌ ఏసీ, ప్రత్యేక థియేటర్లు, మల్టీప్లెక్స్‌లు, ప్రీమియం, నాన్‌ ప్రీమియం, రెగ్యులర్‌, రిక్లెయినర్‌లు అని తేడా లేకుండా అన్ని తరగతులు, అన్ని విభాగాల్లో గంపగుత్తగా ప్రస్తుతమున్న ఒక్కో టికెట్‌ ధరపై అదనంగా రూ.75 చొప్పున పెంచుకునేందుకు అనుమతిచ్చింది. విడుదలైన పది రోజులపాటు ఈ అదనపు ధరలు వసూలు చేసుకోవచ్చంటూ ఈ నెల 17న హోం శాఖ ఉత్తర్వులిచ్చింది. దాని ప్రకారం చూస్తే పేదలకు అందుబాటులో ఉండే నాన్‌ ప్రీమియం విభాగంపైనే అత్యధిక భారం పడింది. పేదోడికి అందుబాటులో వినోదం ఉంచటమంటే ఇదేనా? అన్న ప్రశ్నలు వెల్లువెత్తుతున్నాయి.
వారం క్రితమే జీవో
Movie Ticket Price Issue in AP : ఎక్కువ ధరకు టికెట్‌ కొనుక్కుని సినిమా చూడలేని వారికోసం ప్రతి థియేటర్‌లోనూ మొత్తం సీట్లలో 25 శాతం సీట్లను నాన్‌ ప్రీమియం కేటగిరీకి కేటాయించాలని ఈనెల 7న జారీ చేసిన జీవో 13లో ప్రభుత్వం పేర్కొంది. దానిప్రకారం నాన్‌ ప్రీమియం కేటగిరీ అంటేనే పేదలని చెబుతోంది. మరి ప్రీమియం విభాగాలతో సమానంగా వారిపైన కూడా అదనపు టికెట్‌ భారం మోపడమేమిటి? అది కూడా విడుదల తేదీ నుంచి పది రోజులపాటు అదనపు ధరలు వసూలు చేసుకునేలా వెసులుబాటు కల్పించటమేంటి? అంటే ఆ వ్యవధిలో పేదోడికి సినిమా చూసే అవకాశం ఉండొద్దా? పేదవాడికి అందుబాటులో వినోదం అనేదే.. ప్రభుత్వ లక్ష్యమైతే వారు ఎక్కువగా వెళ్లే నాన్‌ ఏసీ, నాన్‌ ప్రీమియం కేటగిరీల్లో టికెట్‌ ధరలు అదనంగా పెంచేందుకు అనుమతే ఇవ్వకూడదు. కానీ అందుకు భిన్నంగా ప్రభుత్వం వ్యవహరించింది.