పోలీస్ ఎస్కార్ట్​తో కౌన్సిల్​కు ఎమ్మెల్సీ రాంచందర్​రావు

భాజపా ఎమ్మెల్సీ రాంచందర్​రావును పోలీసులు తమ ఎస్కార్ట్​తో కౌన్సిల్​కు పంపించారు. అసెంబ్లీ ముట్టడికి పార్టీ ఇచ్చిన పిలుపు నేపథ్యంలో భాజపా నేతలను పోలీసులు ఎక్కడికక్కడ అరెస్టు చేశారు.

భాజపా చేపట్టిన అసెంబ్లీ ముట్టడి దృష్ట్యా హైదరాబాద్​ తార్నాకలోని పార్టీ నగర అధ్యక్షుడు ఎమ్మెల్సీ రాంచందర్ రావు ఇంటి వద్ద పోలీసులు మోహరించారు. కౌన్సిల్ సమావేశాలు ఉన్నందున ఆయనను పోలీస్ ఎస్కార్ట్​తో మండలికి పంపించారు. రాంచందర్​రావుతో పాటు ఉన్న పలువురు నాయకులను అరెస్ట్ చేసి ఓయూ పీఎస్​కు తరలించారు.

సెప్టెంబర్ 17న తెలంగాణ విమోచనా దినోత్సవాన్ని రాష్ట్ర ప్రభుత్వం అధికారికంగా నిర్వహించాలని ఎమ్మెల్సీ రాంచందర్​రావు డిమాండ్ చేశారు. తెరాస ప్రభుత్వం నిరంకుశంగా వ్యవహరిస్తుందని ఆగ్రహం వ్యక్తం చేశారు. ఉద్యమ సమయంలో అధికారికంగా నిర్వహిస్తామని చెప్పి... నేడు మజ్లీస్ పార్టీకి తలొగ్గి విమోచన దినాన్ని నిర్వహించటం లేదని ఆరోపించారు.

ఇదీ చూడండి:ప్రశ్నోత్తరాల తర్వాత రెవెన్యూ బిల్లులపై చర్చ