రోడ్లు భవనాలు, గృహనిర్మాణ శాఖలపై ప్రశాంత్​రెడ్డి సమీక్ష

రోడ్లు భవనాలు, గృహనిర్మాణ శాఖలపై ఆ శాఖ మంత్రి వేముల ప్రశాంత్​రెడ్డి సమీక్షించారు. కేంద్ర మార్గదర్శకాల ప్రకారం హాట్​స్పాట్​ ప్రాంతాలను వదిలి.. వలస కూలీల క్యాంపులు ఉన్న చోట పనులు ప్రారంభించాలని సూచించారు. అధికారుల సూచనతో ఈనెల 18న యాదాద్రి, హైదరాబాద్​లో క్షేత్రస్థాయిలో పనులను పరిశీలించాలని నిర్ణయించారు.

కేంద్ర ప్రభుత్వ మార్గదర్శకాల ప్రకారం హాట్‌స్పాట్​లను వదిలేసి.. వలస కూలీల క్యాంపులు ఉన్న చోట పనులు ప్రారంభించాలని రోడ్లు భవనాలు, గృహ నిర్మాణశాఖ మంత్రి వేముల ప్రశాంత్ రెడ్డి అధికారులను ఆదేశించారు. ఎర్రమంజిల్‌లోని ఆర్​ అండ్​ బీ కార్యాలయంలో రోడ్లు, భవనాలు, గృహ నిర్మాణ శాఖల పనుల పురోగతిపై మంత్రి వేర్వేరుగా సమీక్షా సమావేశం నిర్వహించారు.

కరోనా మహమ్మారి విజృంభిస్తున్న నేపథ్యంలో రోడ్లు, భవనాలు, గృహనిర్మాణ శాఖల్లో కార్మికుల కోసం తీసుకుంటున్న చర్యలను ఈ సమావేశంలో చర్చించారు. కరోనాపై వలస కూలీలకు అవగాహన కల్పిస్తూ మాస్క్‌లు, శానిటైజర్లు, భోజన వసతి ఏర్పాటు చేయాలని మంత్రి ప్రశాంత్‌ రెడ్డి ఆదేశించారు. కూలీలంతా సమూహంగా పనిచేయకుండా భౌతిక దూరం పాటించేలా చూడాలన్నారు.

ప్రతి జిల్లాలో క్వాలిటీ కంట్రోల్ అధికారులతో ఎన్‌ఫోర్స్​మెంట్ బృందాన్ని ఏర్పాటుచేసి క్షేత్రస్థాయిలో కోవిడ్-19 మార్గదర్శకాలను పాటించే విధంగా చర్యలు తీసుకోవాలని ఆదేశించారు.

రోడ్లు, భవనాల శాఖ గుత్తేదారులకు ఇప్పటికే పూర్తి బకాయిలు చెల్లించామని మంత్రి తెలిపారు. ప్రస్తుతం జరుగుతున్న పనుల్లో వేగం పెంచేలా పర్యవేక్షణ చేయాలని సూచించారు.

అధికారుల సూచన మేరకు ఈనెల 18న యాదాద్రి అభివృద్ధి, హైదరాబాద్​లో జరుగుతున్న పనులను క్షేత్రస్థాయిలో పర్యటించాలని నిర్ణయించారు.

ఇవీచూడండి:కరోనాపై ముఖ్యమంత్రి కేసీఆర్ సుదీర్ఘ సమీక్ష