కరోనాపై మంత్రి సబితారెడ్డి ఉన్నతస్థాయి సమావేశం

కరోనా వైరస్ వ్యాప్తి నివారణకు పాటిస్తున్న లాక్​డౌన్ రంగారెడ్డి జిల్లాలో ఏ విధంగా జరుగుతుందో మంత్రి సబితా ఇంద్రారెడ్డి అధికారులను అడిగి తెలుసుకున్నారు. కలెక్టరేట్ ఆఫీసులో ఉన్నతస్థాయి అధికారులతో సమావేశం నిర్వహించారు.

రంగారెడ్డి జిల్లా కలెక్టర్ కార్యాలయంలో విద్యాశాఖ మంత్రి సబితా ఇంద్రారెడ్డి అధికారులతో ఉన్నత స్థాయి సమావేశం నిర్వహించారు. కరోనా వైరస్​ను అరికట్టేందుకు కేంద్ర రాష్ట్ర ప్రభుత్వాలు ప్రకటించిన లాక్​డౌన్ సమయంలో ప్రజలు ఎలాంటి ఇబ్బందులు పడకుండా చేస్తున్న పలు ఏర్పాట్లపై ఆమె సమీక్షించారు.

రంగారెడ్డి జిల్లా కలెక్టర్ అమయ్ కుమార్, అడిషనల్ కలెక్టర్లు హరీష్, ప్రతీక్ జైన్​లు, ఇతర శాఖల ఉన్నతాధికారులు ఈ సమావేశంలో పాల్గొన్నారు. అత్యవసర సేవలు, ప్రజలకు అవసరమయ్యే నిత్యావసరాలు, ఉచిత బియ్యం పంపిణీ, పారిశుద్ధ్యం, మాస్కులు, శానిటైజేషన్ నిర్వహణ తదితర అంశాలపై వివరాలు అడిగి తెలుసుకున్నారు.

లాక్​డౌన్ సమయంలో ప్రజలు ఇబ్బంది పడకుండా 12 కిలోల ఉచిత బియ్యం, రూ. 1500 ఇస్తున్నట్టు చెప్పారు. ఇప్పటి వరకు జిల్లాలో 8 పాజిటివ్ కేసులు నమోదైనట్టు ప్రకటించారు. గచ్చిబౌలి క్వారంటైన్ కేంద్రంలో 57 మంది, రాజేంద్రనగర్​లో 64మంది క్వారంటైన్​లో ఉన్నారని తెలిపారు. ప్రజలెవ్వరూ రోడ్లపైకి రావొద్దని, వైరస్ తీవ్రత తగ్గాలంటే ప్రతీ ఒక్కరూ స్వీయ నియంత్రణ పాటించాలని కోరారు.

ఇదీ చూడండి:పత్రికల ద్వారా కరోనా సోకదు