జులై 1న ఆంధ్రా-ఒడిశా బోర్డర్ ప్ర‌త్యేక జోనల్ క‌మిటీ ప‌రిధి ఆధ్వ‌ర్యంలో బంద్ నిర్వహిస్తున్నట్లు ఏవోబీ ఎస్‌జెడ్సీ కార్య‌ద‌ర్శి గ‌ణేశ్ ఒక ప్ర‌క‌ట‌న‌లో తెలిపారు. ఈనెల 16న ఉదయం 9.30 గంటలకు తీగలమెట్ట గ్రామానికి దూరంగా అడవిలో మావోయిస్టులు మకాం వేసి ఉన్న ప్రాంతాన్ని ద్రోహులు ఇచ్చిన స‌మాచారంతో పోలీసు బలగాలు చుట్టుముట్టి దాడి చేశారని గ‌ణేశ్ ఆరోపించారు. ఈ దాడిలో ఎంకేవీబీ డివిజ‌న్ క‌మిటీ స‌భ్యుడు ర‌ణ‌దేవ్‌, మ‌రొక డివిజ‌న్ క‌మిటీ స‌భ్యుడు అశోక్ అలియాస్ గంగ‌య్య, ఏరియా క‌మిటీ స‌భ్యురాలు క‌డితి పాయికే, మ‌డ‌కం అంజ‌న్న, మ‌డ‌కం పాయికే, ల‌లితలు అమరులయ్యారని తెలిపారు.
దేశంలోనూ, రాష్ట్రంలోనూ ఒక వైపు కరోనా సమస్యలతో ప్రజల జనజీవనం అల్లకల్లోలంలో ఉన్న పరిస్థితుల్లో మావోయిస్టు పార్టీ ప్రజల కోసం వైద్యం, ఆహారం అందించడం వంటి కార్యక్రమాలను ప్రధానంగా చేస్తున్నామని.. ఎలాంటి ప్రతిఘటన చర్యలను చేపట్టలేదని గ‌ణేశ్ తెలిపారు. ఆదివాసీ ప్రాంతంలో ప్రభుత్వం కనీసం వైద్యం అందించడం కాదు కదా.. కరోనా టెస్టింగ్ కూడా చేయలేదని, ఇంతవరకూ మన్యంలో ఏ ఒక్క డాక్టరూ రాలేదని ఆవేదన వ్యక్తం చేశారు. కోట్లాది రూపాయలు ఖర్చుతో వందలాది పోలీసు బలగాలను ఆదివాసీ ప్రాంతంలోకి ప్రభుత్వం పంపిస్తుందని మండిపడ్డారు.