దక్షిణ మధ్య రైల్వేజోన్‌ పరిధిలో పలు రైళ్లు ఇక మరింత వేగంతో దూసుకెళ్లనున్నాయి. ఈ మేరకు వాటి గరిష్ఠ వేగ పరిమితిని గంటకు 110 కి.మీ.ల నుంచి 130 కి.మీ.లకు పెంచినట్లు ద.మ. రైల్వే వెల్లడించింది. జోన్‌ పరిధిలోని పలు ముఖ్యమైన సెక్షన్లలో వేగాన్ని పెంచనున్నట్లు తెలిపింది. ఇది నేటి నుంచే అమల్లోకి రానుంది. జోన్‌ పరిధిలోని సికింద్రాబాద్‌, విజయవాడ, గుంతకల్‌ డివిజన్లలోని అత్యధిక సెక్షన్లలో ఈ వేగం పెరుగుతుందని రైల్వే వర్గాలు తెలిపాయి. అయితే రైళ్ల వేగం పెరుగుతున్నప్పటికీ ప్రయాణ సమయం తగ్గడానికి మరిన్ని చర్యలు చేపట్టాల్సి ఉంది. పరిశోధన నమూనాలు, ప్రమాణాల సంస్థ (ఆర్‌డీఎస్‌ఓ-లఖ్‌నవూ) అనుమతించాక 2020 నుంచి ట్రాక్‌ల నిర్వహణ, సిగ్నలింగ్‌ పనులు చేపట్టి పూర్తిచేశారు. సికింద్రాబాద్‌ డివిజన్‌లోని సికింద్రాబాద్‌-కాజీపేట-బల్లార్ష, కాజీపేట-కొండపల్లి; విజయవాడ డివిజన్‌ పరిధిలోని కొండపల్లి-విజయవాడ-గూడూరు; గుంతకల్‌ పరిధిలో రేణిగుంట-గుంతకల్లు-వాడి సెక్షన్లలో గరిష్ఠ వేగం 130 కి.మీ.లకు పెంచారు. ఆయా మార్గాల్లో ఇంతకు మించిన వేగంతో రైళ్లు పరుగులు తీసినా తట్టుకునేలా ట్రాక్‌లను పటిష్ఠం చేశారు. వేగం పెంపునకు కృషిచేసిన అధికారులు, సిబ్బందిని దక్షిణ మధ్య రైల్వే ఇన్‌ఛార్జి జీఎం అరుణ్‌ కుమార్‌ జైన్‌ అభినందించారు.
ప్రయాణ సమయం తగ్గాలంటే..దూర ప్రాంత రైళ్ల ప్రారంభ, గమ్యస్థానాలు వేర్వేరు రాష్ట్రాల పరిధిలో ఉంటాయి. ఆయా మార్గాల్లో అనేక డివిజన్లను దాటాలి. అలాగే గరిష్ఠ వేగాన్ని హైదరాబాద్‌, గుంటూరు, నాందేడ్‌ డివిజన్లలో పెంచలేదు. ఇక్కడా ఆ పనులు పూర్తయితేనే రైళ్లు ప్రయాణ సమయం తగ్గుతుంది. విజయవాడ డివిజన్‌లోనూ విశాఖపట్నం వైపు వెళ్లే కీలకమార్గం విజయవాడ-దువ్వాడ సెక్షన్‌లో రైళ్ల వేగాన్ని పెంచలేదు.
* పలు సెక్షన్లలో 130 కి.మీ.ల గరిష్ఠ వేగంతో రైళ్లు నడిపించనున్నట్లు రైల్వేశాఖ ప్రకటించినా ఆ వేగం ఆధునిక ఎల్‌హెచ్‌బీ బోగీలున్న రైళ్లకే పరిమితం కానుంది. పాతతరం ఐసీఎఫ్‌ (రైలుపెట్టెల కర్మాగారం) కోచ్‌ల సామర్థ్యం గంటకు గరిష్ఠంగా 110 కిలోమీటర్లే. గోదావరి, గోల్కొండ, నారాయణాద్రి, రాయలసీమ, తెలంగాణ, తిరుపతి-జమ్ముతావి హమ్‌సఫర్‌, లింగంపల్లి-విజయవాడ ఇంటర్‌సిటీ, దక్షిణ్‌, చార్మినార్‌, గుంటూరు ఇంటర్‌సిటీ, జైపుర్‌, ఎల్‌టీటీ దురంతో, కాగజ్‌నగర్‌, విశాఖపట్నం డబుల్‌డెక్కర్‌, ధర్మవరం, కోకనాడ సహా 37 రైళ్లే ఎల్‌హెచ్‌బీ కోచ్‌లతో నడుస్తున్నాయి. ఈ రైళ్లకు 54 రేక్‌లు ఉన్నాయి. ఒక్కో రేక్‌లో 22 బోగీ (కోచ్‌)లు ఉంటాయి. జోన్‌లో మొత్తం బోగీల్లో వీటిసంఖ్య ఐదో వంతే.