రాగల 24 గంటల్లో ఏపీలో వర్షాలు

బంగాళాఖాతంలో ఏర్పడిన అల్పపీడనం వాయుగుండంగా మారుతుందని వాతావరణ శాఖ స్పష్టం చేసింది. ఈ నేపథ్యంలో ఏపీలో అన్ని జిల్లాల్లోనూ మోస్తరు నుంచి విస్తారంగా వర్షాలు కురుస్తాయని అమరావతిలోని వాతావరణ కేంద్రం తెలియజేసింది.

తూర్పు మధ్య బంగాళాఖాతంలో అల్పపీడనం కొనసాగుతోంది. రాగల 24 గంటల్లో ఇది క్రమంగా బలపడి వాయుగుండంగా మారుతుందని వాతావరణశాఖ స్పష్టం చేసింది. దీని ప్రభావంతో ఏపీలోని అన్ని జిల్లాల్లోనూ మోస్తరు నుంచి విస్తారంగా వర్షాలు కురుస్తాయని అమరావతిలోని వాతావరణ కేంద్రం తెలియజేసింది. ఒకటీ రెండుచోట్ల భారీ నుంచి అతి భారీ వర్షాలు కురిసే సూచనలు ఉన్నాయని అధికారులు చెబుతున్నారు.

వాయుగుండం ప్రభావంతో కోస్తాంధ్ర జిల్లాలతో పాటు రాయలసీమ, తెలంగాణా, ఒడిశా, ఛత్తీస్​గఢ్​​లలోనూ చాలాచోట్ల విస్తారంగా వానలు పడే అవకాశముంది. వాయుగుండంగా మారిన అనంతరం ఇది పశ్చిమ వాయవ్య దిశగా కదులుతూ 12 న ఉదయానికి ఉత్తర కోస్తా తీరంలోని విశాఖ వద్ద తీరాన్ని దాటే అవకాశముందని అంచనా వేస్తున్నారు.

ఏపీ రాష్ట్రవ్యాప్తంగా ఉభయగోదావరి, కృష్ణా, గుంటూరు, ప్రకాశం, నెల్లూరు జిల్లాలతో పాటు రాయలసీమలోని చిత్తూరు, అనంతపురం జిల్లాల్లోనూ మోస్తరు నుంచి తేలికపాటి వర్షాలు కురుస్తున్నాయి. ప్రస్తుతం రాష్ట్రంలోని చాలా ప్రాంతాల్లో ఆకాశం మేఘావృతమై ఉన్నట్టు వాతావరణశాఖ తెలిపింది. కృష్ణా జిల్లా నూజివీడులో 3 సెంటిమీటర్లు, పశ్చిమ గోదావరి జిల్లా ఆచంటలో 2.6 సెంటిమీటర్లు, చిత్తూరులో 1, కర్నూలు ఓర్వకల్లులో 1 సెంటిమీటరు మేర వర్షపాతం నమోదైంది.

ఇదీ చదవండి:ప్రగతి భవన్​ ముట్టడించిన టీచర్లు.. అరెస్ట్ చేసిన పోలీసులు